Leita í fréttum mbl.is

Bloggfærslur mánaðarins, janúar 2009

Ræðan sem ég flutti á Austurvelli í dag.

Kæra þjóð...góðir íslendingar og æðislegu mótmælendur.

Ég stend hér með ykkur í dag vegna þess að ég á erindi við ykkur. Mjög mikilvægt erindi og mér líggur margt á hjarta.

Það er sífellt verið að spyrja "Af hverju ertu að mótmæla" og fjölmiðlarnir sitja um fólk og spyrja "Hverju ertu að mótmæla"?. Eins og það sé ekki augljóst??

 Ég skal bara telja upp fyrir ykkur ástæðurnar fyrir því að ég miðaldra húsmóðir í vesturbænum hef staðið og barið ruslatunnulokið mitt með súpuausunni eins og ég ætti líf mitt að leysa undanfarið. Og í raun finnst mér að líf okkar liggi við og að við verðum að taka höndum saman og gera stórkostlegar breytingar á samfélaginu okkar ef það á að verða lífvænlegt fyrir okkur og framtíðarábúendur þessarar eyju.

Ég segi bara eins og þú minn kæri Jón Sigurðsson..ég mótmæli og þetta er það sem ég mótmæli af öllu mínu konuhjarta.

Spilling, siðleysi, blinda, græðgi, þöggun, skilningsleysi, afneitun, samtrygging, lygar,

glæpir, þrjóska, vanhæfi, einkavinavæðing, hroki, vanvirðing, handtökur, ofbeldi, leti,

sinnuleysi, ráðaleysi, gáleysi, fyrirhyggjuleysi, hræsni, fyrirlitning, arðrán,

bankaleynd, leynifundir, plott, forsjárhyggja, stjórnleysi, stefnuleysi, valdníðsla,

valdagræðgi, eiginhagsmunir, sjálftaka, sérhyggja, landráð, eftirlitsskortur,

Á ég að halda áfram?

rannsóknarskandall, fjármagnsflutningar, fagurgali, efasemdir, siðblinda,

efnahagsofbeldi, skoðanakúgun, stjórnsýslulagabrot, undanskot, fláræði, undirferli,

ábyrgðarleysi, alræði, kúgun, lögleysa, lögbrot, gjaldþrot, hrun, getuleysi,

sýndarveruleiki blekking, yfirhylming, siðrof, trúnaðarbrestur, vantraust, slímsetur,

Ég er ekki búin það er fleira sem ég mótmæli...

firring, fáránleiki, framkvæmdaleysi, óheiðarleiki, ógegnsæi, feluleikur, flokksræði,

mafía, minnisleysi, undanbrögð, klíkuskapur, vonleysi, valdatafl, ósómi, neyðarlög,

ólög, mannréttindabrot, auðvaldsklíkur, hagsmunagæsla, mannfyrirlitning,

óskammfeilni,sukk, svínarí, veruleikafirring, fjölmiðlaþöggun, upplýsingaskortur,

samsæri, niðurskurður, ótti, ósamræmi, svindl, baktjaldamakk, rányrkja, kvótasvindl.

Gleymdi ég einhverju mikilvægu?

Eins og þið heyrið þá höfum við ærna ástæðu til að standa hér saman í dag eins og undanfarna mánuði. Margar ógnvænlegar ástæður til að krefjast gagngerra og róttækra breytinga á samfélaginu okkar. Samfélagi sem er orðið eins og þrútið illalyktandi graftarkýli af spillingu, græðgi og siðleysi.

Krafa okkar er einföld. Við krefjumst þess að graftarkýlið verði sprengt , gröfturinn hreinsaður út svo við getum byrjað að heila samfélagið okkar á öllum sviðum og gert það mannvænlegt og heilbrigt á ný.

Við erum ekki tilbúin að ganga í gegnum alla þá baráttu sem við nú stöndum í til þess eins að fá einhverjar yfirborðsbreytingar og hrókeringar á ráðaherrastólum og örfáum embættum svo ballið geti haldið áfram eins og ekkert hafi í skorist.

Að valdið færist frá hægri höndinn yfir í þá vinstri á þursinum sem hefur setið á þessari þjóð með öllum sínum þunga og nærri kramið úr henni lífskraftinn. Að það sé nóg að setja mislita plástra á graftarkýlið og þá verði allt í lagi. Það skiptir engu máli hvort plásturinn er rauður, grænn eða blár sem settur er á meiddið.

Gröfturinn fer ekki fyrr en þetta graftarkýli spillingar, samtryggingar og valda hefur verið sprengt.   Og það er þess vegna sem við þjóðin, þessi íslenska stórfjölskylda sem við erum í raun hefur nú þust út á göturnar með látum með potta og pönnur, trommandi takt samstöðunnar inn í þjóðarsálina til að knýja fram raunverulegar breytingar. Alvöru umbyltingu  sem nær til allar þeirra þátta sem sýktir eru. Ekki bara einhverja sýndarmennsku og yfirklór. Við viljum alvöru mannleg gildi og raunverulegt frelsi.

Við erum að kafna undir rassgatinu á þessum þurs sem setið hefur á okkur alltof lengi..og við viljum hann í burt í eitt skipti fyrir öll svo við getum andað og byrjað uppá nýtt.

Ráðamenn halda kannski að við munum sætta okkur við einhverjar yfirborðstilfæringar, að þeir geti róað okkur með því að boða til kosninga og leyfa okkur að kjósa þetta sama kerfi yfir okkur aftur.   Að þeir geti leitt okkur eins og eyrnamerktar kindur í gömlu réttina og villt um fyrir okkur með því að mála girðinguna nýjum litum.

Það er sko alger misskilningur að við sættum okkur við slíka gjörninga.

 Meðan að þið ráðamenn fóruð í langt jólafrí og hvílduð ykkur eftir að hafa sofið á verðinum meðan þjóðin var  sett á hausinn .. brenndum við stóra jólatréð sem hér stóð á Austurvelli á rjúkandi réttlætisbáli.

Skilaboðin eru skýr ráðamenn. Jólin eru búin og nýtt ísland mun rísa úr öskunni, hvort sem ykkur líkar betur eða verr. Og nýja Ísland mun rísa á okkar forsendum..okkar fólksins í landinu, hinnar íslensku stórfjölskyldu  sem á þetta land, á auðlindirnar og stendur vörð um hagsmuni okkar og framtíð.

Svo spyrja menn og konur..Og hvað á svo að koma í staðinn fyrir stóra feita og ljóta þursinn ?....eins og hann sé eini bjargvætturinn í ævintýrinu sem okkur standi til boða.

Ég skal segja ykkur hvað kemur í staðinn.   Við sjálf.Í öllum okkar mannauðskrafti viti og visku. Upp úr grasrótinni munu spretta ný ævintýri sem við skrifum sjálf eftir okkar eigin duglega og klára höfði og eftir  réttlátum hjartslætti þjóðar sem skynjar hvar þarfir hennar liggja og sem veit hvert hún vill fara.

Gefum börnunum okkar nýja von, skýra framtíðarsýn og samfélag sem er heilbrigt og réttlátt.. Ég trúi á hugrekki okkar til að gera nauðsynlegar breytingar og ég treysti þessari þjóð til góðra verka. Þess vegna stend ég hér.

Við..ég og þú eigum mikilvægt erindi á þessum ögurstundum.

Erindi við nýja framtíð.

Mig langar að lokum að flytja ykkur fyrsta erindi ljóðs sem ég flutti á 17. júni í hafnarfirði  sem fjallkonan þegar ég var tólf ára gömul. Standandi upp á gömlum og lúnum kókkassa svo ég sæi yfir ræðupúltið. Af einhverri ástæðu sækja þessi orð fast að mér núna. 

Þau eiga líklega við okkur erindi!!

 

 Enn kem ég til þín íslenska þjóð

 sem átt þér sagnaminningar og ljóð

og byggt hefur þetta blessaða land

í ellefu hundruð ár.

Goldið afhroð, glaðst og sigrað

Grátið svo þín tár eru perlum öllum dýrri

Okkur þeim sem lifa.

 

 Já það má segja að við höfum goldið afhroð kæra stórfjölskylda en við eigum eftir að gleðjast  aftur og við munum sigra.

austurv_llur.jpg

 

Hægt er að hllusta á allan fundinn á www.ruv.is þar sem fréttin af fundinum er og þar er linkur.

veljið rás 2 ...31.janúar..merkt mótmælafundur á Austurvelli.

 

 2009-01-31

Katrín Snæhólm Baldursdóttir

Grænn og fjólublár dagur.

venusTungl

Venus og Tunglið.

Tunglið fangar kraftinn og Venus er hin fullkomna útkoma.

Fín blanda fyrir þennan dag og það eru margar skrítnar sögur úr fortíð og framtíð sem renna saman í eina í gegnum þessa liti og þessi tákn. 

Gamlir þræðir og nýjir ofnir í leikfléttu sem á sér stað og stund hér og nú. Litir sem renna saman og allt í einu er ljóst að akkúrat svona átti þetta allt að vera.  Umbreytingin á íslenskum veruleika er að ganga í garð og við erum þátttakendur í henni hvort sem okkur líkar betur eða ver. Og við höfum þetta einstæða val og frelsi..viljum við vera áhorfendur eða þáttakendur?

sköpun

 


Súrealískur veruleiki eða bara vondur draumur??

Nennir einhver að vekja mig..mig er að dreyma eitthvað svo undarlega og óhugnanlega.

Sigmundur Ernir var í útvarpinu og sagði að honum þætti gaman að smíða og nú vill hann fá að smíða "þjóð" og er leiður yfir að hafa ekki getað staðið betur með mótmælendunum sem hann laug uppá á gamlárs vegna þess að vondu vinnuveitendurnir hans gerðu hann svo klofinn.  kb

Og Samfylkingin sem hefur verið elt á röndum með orðunum vanhæf ríkisstjórn og sterkar kröfur almennings um gegnsæi og spillinguna burt, er að spá í að setja mann sem er fastur undir borði sem Dómsmálaráðherra og svo flýgur lítill fugl í kringum húsið mitt og syngur um það að efnhagsbrotadeildin hefur ENGIN mál til að rannsaka og rannsóknarnefndin sem skipuð var fyrir jól má ekki byrja að rannsaka og vinna fyrr en 1. mars.

Ofan á þaki seðlabankans situr svo úfinn þurs og hlær og prumpar til skiptis á þjóðina þegar hún reynir hvað eftir annað að lyfta hans þunga rassi af bankanum..en í hvert skipti þyngist þursinn meir og meir og það fara að vaxa leyndarmál um alls kyns menn og auðmenni í hárinu á honum. Og hann les ljóð upp úr svartri vasabók um land og þjóð sem einu sinni var.

Þá voru  sett lög um að ekki mætti hreyfa við honum í 7 ár af besta vini hans sem leikur Shrek í Hollywood. Þá önduðu nú margir léttar en á meðan var fólkið sem missti vinnuna tekið og breytt í krónur á seðlabankastéttinni sem hinir löbbuðu á allan daginn sem voru með vinnu..vinnu sem var ekki hægt að hætta í.

Einhversstaðar í bakgrunninum á öllum þessum martraðarkenndu atriðum heyri ég svo Steingrím Joð hvísla.".langtímastjórn, langtímastjórn..við erum komin til að vera" og við mótmælendur förum að hágráta og segjum..Já en við vildum alvöru breytingar og hvað með lýðræðið? Við viljum ykkur ekki..við TREYSTUM ykkur ekki.

Og þá sprettur Ingibjörg fram með bláa gimsteina kórónu styður sig við  þernu sína og segir...

Æ góða hættu þessu væli þú þarna ekki Katrín....við erum búin að gulltryggja okkur og okkar spennandi og skemmtilegu framtíð.

Ungi fallegi framsóknarprinsinn sem allir héldu að hefði óvart dottið inn af götunni og verið kosinn því hann hefði svo hlýlegt bros og mjúkar kinnar var með valdaklíku framsóknar í vinstri vasanum og hún byrjaði að klifra um allt og festa niður valdatákn um alla veggi með nöglum sem á stóð...Auðgildi ofar manngildi.

10150263

Og svo hlógu þau og hlógu og dönsuðu í heilögum hring þar sem hver höndin hélt fast í aðra og við þjóðin grétum og grétum og þá kom löggan og úðaði á okkur hvalspiki og Kristján Loftsson skyrpti út sér .."SO WHAT"  þegar við báðum hann að bjarga okkur og sagði að landhelgisgæslunnni hefði verið sökkt og að enginn útlendingur myndi neitt vilja með okkur hafa og allra síst bjarga okkur þar sem við hefðum rænt og ruplað, verið lygin og óheiðarleg og drepið öll fallegustu og bestu dýrin í heiminum.

Þá kom Sigmundur Ernir aftur og fór að smíða sjónvarp úr járni sem hann fann við Tónlistarhúsið og vildi fá mig í viðtal um lygafréttir Þagganir og þaulæfða fréttaútúrsnúninga og svo þegar ég gat alls ekki  þagað og varð að segja satt um allt varð hann svo reiður að hann klippti kapalinn og fór í framboð án hælsins sem hann og kona hans höfðu búið undir í hálfa öld samanlagt. Setti á sig svarta grímu svo fólkið myndi ekki vita hverjum það væri að greiða atkvæðið.

Ég er föst í þessari martröð og bíð eftir að vakna. Vonandi vekja mig trumburnar, syngjandi pottarnir og pönnurnar og allt fólkið sem angaði af yndislegum appelsínuilmi...fólkið sem trommaði með mér fyrir Nýju Íslandi. Sem trúa því enn að þetta muni takast og íslendingar séu svo vel vaknaðir af vondum draumum að það verði aldrei aftur hægt að telja þeim trú um að það sem er óréttlátt og vont sé réttlátt og gott. Að við vitum núna muninn og gleymum honum aldrei. Aldrei!!!!

Svei mér þá ef grasrótin er ekki bara að vaxa og það um miðjan vetur..það eru farnir að sjást íðagrænir sprotar hér og þar um allt land. Ætli hann Össur viti af þessum vaxandi vonarsprotum?

En hjartað slær hraðar og vonin vex og kannski, já kannski verður þetta allt nýtt á morgun og þá nenni ég að vakna og vinna og taka fagnandi á móti vorboðanum ljúfa. Kosningunum þar sem þjóðin fær öll atkvæðin. Hvert og eitt einasta.10131867


Þung eru sporin mín..

100_3338

....Þegar ég hugsa til þess að kannski verði áfram vanhæf Ríkisstjórn við völd. Ég vil sjá óháða utanþingsstjórn sem vinnur að hag okkar fram að kosningum og taki rækilega til hendinni og geri það sem þarf að gera.

Hef enga trú á að flokkarnir munu muna eftir okkur í kosningabaráttunni sinni og hagsmunum okkar. Frekar munu þeir stýra björgunarleiðangri sínum að sjálfum sér og hagsmunum sínum...eins og alltaf.

Já svona gerist þegar traustið er farið. Hvernig í ósköpunum á maður að trúa orði af þessum spunavef sem uppúr þeim vellur dagana út og inn eftir að hafa horft upp á þetta leikhús fáránleikans ná nýjum hæðum daglega í marga mánuði og ár?

En ég horfi hugfangin á rauðu skóna mína og hlakka til þegar þessum þungu hnullungum vantrausts og spillingar verður kastað út í sjó og við dönsum appelsínugula búsáhaldadansinn á Austurvelli þegar hin sanna lýðræðisbylting verður ....þegar við kjósum fólk sem við getum treyst og veljum eftir hæfi en ekki hagsmunum auðvalds og framapots.

Og ég veit innst inni í hjarta mínu að einn góðan veðurdag verður það svoleiðis og ég veit líka að það er undir okkur sjálfum komið. Ohhh hvað ég vona að það verði fyrr en seinna. Hef ekki þolinmæði í meira svona rugl.

Hvar er nú potturinn minn og ausan?   Tromm tromm bomm....!!!


Mótmælin hafin enn á ný á Austurvelli..og allir að kíkja á www.lydveldisbyltingin.is

Þetta eru skrautlegir dagar og stundir....Stöndum þétt saman kæru íslendingar og munum að markmiðið er raunverulegt lýðræði og að rífa upp spillingaröflin með rótum í eitt skipti fyrir öll.

Sit hér heima með kvefpest og sýkingu og munn eins og Miss Monster, hlusta á lúðrana á Austurvelli þar sem mótmæelendur eru mættir enn og aftur og horfi löngunaraugum á gömlu málingardolluna sem húkir einmana í ganginum hjá mér. Bíður eftir að vera trommuð með sleif og tjúttuð undir þjóðarsöngnum...Vanhæf Ríkisstjórn, vanhæf ríkistjórn..bomm bomm bomm!

Líst vel á framboð grasrótarinnar. Þar er raunverulegur vilji á ferð til lífsnauðsynlegra breytinga og ég hef fulla trú og traust á því að landsmenn munu skynja hvað eru aðalatriðin núna og flykkja sér í grasrótina. Við þurfum að hjálpast að við að gera breytingarnar..hugsið ykkur ef flokkamaskínurnar ætla fara að taka þessi málefni upp á sína arma. Það myndi enda eins og eftirlaunafrumvarpið eða öll gömlu kosningaloforðin sem enginn af þeim man lengur hver voru.

Núna er tíminn til að trúa og treysta á okkur sjálf..við vitum allavega að við munum ekki undir neinum kringumstæðum svíkja börnin okkar eða framtíð þeirra. Flykkjum okkur saman og gerum lýðræðisbyltinguna NÚNA!!!

Verum í bandi....


Nú reyna pólitíkusarnir að tala eins og mótmælendur..hahaha!!!

Æ....þetta er súrrealískt fyndið að heyra. Er að hlusta á Sprengisand á Bylgjunni og get ekki betur heyrt en að pólitíkusarnir sem þar sitja reyni nú að tileinka sér málstað mótmælenda og troða honum upp í munninn á sér og reyna svo að frussa honum yfir væntanlega kjósendur sína eins og hann hafi alltaf verið þeirra eigin. Tala núna eins og þeir séu að halda ræður á Austurvelli.

Greyin átta sig ekki á að Íslenska þjóðin er glaðvöknuð og mun ekki láta neitt glepja sig framar. Við erum rétt að byrja og munum ekki unna okkur hvíldar fyrr en við höfum skapað hér samfélag sem er fyrir okkur öll og á okkar forsendum. Okkar fólksins í landinu. Svo einfalt er það nú. Burt með spillingarliðið..þið getið ekki kastað ryki í augu okkar framar...réttast væri að þið sæuð sóma ykkar í því að hella upp á kaffi hjá nýju lýðræðisöflunum sem nú undirbúa framboð sín og þjónustu og gerðuð þar með eitthvað gagn fyrir fólkið ykkar.

Ég elska ísland og takk takk takk þið öll sem mættuð á þennan magnaða fund á Austurvelli í gærInLove

....ég mun aldrei á ævinni gleyma þessari himnesku tónlist sem við höfum framið hvern dag á potta pönnur og trumbur. Þessi taktur er nú í blóðinu á mér og hjartanu og höfðinu. Mér líður eins og við séum svona tribe sem man allt í einu um hvað hann er og hvaða erindi við komum til að sinna og ekkert geti nú stöðvað þennan kraft sem nú hefur verið leystur úr læðingi.

14

Ahhhh..nú ætla ég að beina sjónum mínum að þeim nýja krafti sem risið hefur upp fyrir nýju lýðveldi og þeirri umbyltingu sem mun óhjákvæmilega verða hér og leyfa gömlu pólitíkusunum og þeirra úreltu eiginhagsmunahugmyndafræði að röfla sig hás.

Ég mun ekki hlusta og það mun þjóðin ekki gera heldur. Vantraust mitt á ykkur er algert og mótmælin munu halda áfram sem aldrei fyrr þar til markmiðum okkar hefur verið náð.

Endilega skoðið þetta og skráið ykkur.

Lengi lifi samstaðan!!!!

www.nyttlydveldi.is


Tíminn er NÚNA!!! Baráttan er hafin.

Má eiginlega ekki  vera að því að blogga..hef verið að lesa yfir fréttir og blogg eftir atburði næturinnar.

Harkan sem BB boðaði í gærmorgun er greinilega innleidd. Það er auðvitað barnaskapur að ætla að þeir sem hér hafi völdin og auðinn muni leyfa að valdabáti þeirra sé í alvöru ruggað án þess að þeir bregðist harkalega við. Víla ekkert fyrir sér að beita gasi, kylfum, lögregluher, þöggunum, kúgunum, óttaáróðri og bara hverju sem þarf. Völdin munu þeir aldrei láta baráttulaust og það segir sig sjálft að nú er farið að fara um þá þegar þeir sjá að okkur er fúlasta alvara með að við krefjumst breytinga og að spillingunni sem gegnsýrir samfélagið okkar verði útrýmt.  

Það færist harka í málin...ég dreg til ábyrgðar ráðamenn sem hafa skellt skollaeyrum við ákalli fólksins sem hefur staðið friðsamt á götum úti svo mánuðum skiptir. Það er margbúið að vara þau við að svona geti farið..en svo hella þau olíu á eld í hvert sinn sem þau opna munninn í fjölmiðlum eða á fjöldafundum með hroka sínum og vanvirðingu við fólkið í landinu. Og senda svo alvopnaða lögreglu á fólkið þegar það bregst við ömurleikanum sem við blasir með þau orð á vörum að þau séu hreint ekkert á förum enda séum við dauðvona og grafin án þeirra. Hvílík firring!!!!

Því miður leynast í röðum hins almenna mótmælanda fólk sem vill fæting og ofbeldi...eins er innan raða lögreglunnar. Þar leynast inn á milli fantar sem vilja það líka.  Við hin sem erum þúsundir skulum halda áfram baráttunni af krafti styrk og samstöðu og gefum ekki tommu eftir..án ofbeldis eins lengi og við getum.  Við skulum ekki leyfa neinum að rugla saman baráttu fólksins í landinu gegn grímulausu valdinu....við ofbeldisverk fárra. Lögreglan má líka alveg passa sig að vera ekki stöðugt að ögra. Vöndum okkur, tölum saman og verum virkilega vakandi í dag og næstu daga og höldum hópinn. Verjum okkar fólk og grípum inní þegar ofbeldi er að brjótast út. Það vill enginn að fólk stórslasist hér.

Þegar ég tala um "okkar fólk" á ég við að við verjum hvern þann sem veitst er að með ofbeldi..hvort sem það er almennur borgari eða lögreglumaður við störf sín og HINDRUM ofbeldi.

Friðsamir mótmælendur merkja sig nú með appelsínugulu!!!

Vinnum þetta saman..sjáumst á Austurvelli með troðfulla potta af friði og krafti..og sigri okkar fyrir réttlæti!!! Tíminn er NÚNA!!!

 


Þetta eru mínar ástæður fyrir að ég mótmæli, mótmæli og mótmæli og mun ekki hætta að mótmæla fyrr en spillingarliðið er farið frá. Eins og það leggur sig.

Spilling, siðleysi, blinda, græðgi, þöggun, skilningsleysi,afneitun, samtrygging, lygar, glæpir, þrjóska, vanhæfi, einkavinavæðing, hroki, vanvirðing, handtökur, ofbeldi, leti, sinnuleysi, ráðaleysi, gáleysi, fyrirhyggjuleysi, hræsni, fyrirlitning, arðrán, bankaleynd, leynifundir, plott, forsjárhyggja, stjórnleysi, stefnuleysi, valdníðsla, valdagræðgi, eiginhagsmunir, sjalftaka, sérhyggja, landráð, eftirlitsskortur, rannsóknarskandall, fjármagnsflutningar, fagurgali, efasemdir, siðblinda, efnahagsofbeldi, skoðanakúgun, stjórnsýslulagabrot, undanskot, fláræði, undirferli, ábyrgðarleysi, alræði, kúgun, lögleysa, lögbrot, gjaldþrot, hrun, getuleysi, sýndarveruleiki blekking, yfirhylming, siðrof, trúnaðarbrestur, vantraust, slímsetur, firring, fáránleiki, framkvæmdaleysi, óheiðarleiki, ógegnsæi, feluleikur, flokksræði, mafía, minnisleysi, undanbrögð, klíkuskapur, vonleysi, valdatafl, ósómi, neyðarlög, ólög, mannréttindabrot, auðvaldsklíkur, hagsmunagæsla, mannfyrirlitning, óskammfeilni,sukk, svínarí, veruleikafirring, fjölmiðlaþöggun, upplýsingaskortur, samsæri, niðurskurður, ótti, ósamræmi, svindl, baktjaldamakk, rányrkja, kvótasvindl.

Gleymdi ég einhverju mikilvægu?

Farin niður á Austurvöll aftur og kem ekki heim fyrr en þetta lið er farið frá. Byltingin er hafin.


Eru stjórnvöld hræddari við auðvaldið sem virðist hafið yfir lög og reglur landsins en kjósendur sína. Hvaða hreðjatak hafa auðmennin á valdhöfunum og er vald þeirra tryggt af auðmönnunum??

 Maður spyr sig margra spurninga þessa dagana.

Er það eðlilegt að fyrirtæki sem uppvís verða að því að fara framhjá lögum og reglum fái óáreitt að halda því áfram meðan mótmælendur eru sóttir í vinnu sína og færðir í yfrirheyrslur og skýrslutökur af lögreglunni? Að glæpamennirinir gangi lausir og almenningur sé hnepptur í varðhald fyrir að mótmæla augljósum brotum í stjórnsýslu og framferði ráðamanna og auðmanna.

Svona utanfrá séð þá sýnist mér að ráðamönnum sé hreinlega ekki sjálfrátt, undirförul augnaráð og stam og tuð þegar þeir eru spurðir einfaldra spurninga vekur upp grunsemdir að þeir þori hreinlega ekki að segja neitt sem máli skiptir og standi saman vörðinn.  Vörðinn um auðmennin sem tryggja þeim völdin, ráðamönnunum sem svo aftur tryggja auðmönnunum fjármagnið sem stjórnar öllu hér. Öflin sem leiðast saman í heilögum hring.

Við hin erum bara ómerkileg peð á þessu taflborði sem þetta lið hikar ekki við að fórna í þessu valdatafli sínu og samtryggingu um sameiginlega hagsmuni sína.

Kannski er ég bara einföld kona með hausinn fullan af óþægilegum spurningum. En ég er ekki ein. Við erum þúsundir sem veltum fyrir okkur hvað sé hér í gangi og við vitum að það er eitthvað mjög óhreint. Mjög mjög óhreint. Það er hvergi að finna heila brú af skynsemi eða alvöru hugsun í þessu leikriti. Og við erum hreint ekki tilbúin að sitja undir þessu lengur.

Samfélagið er gjörsamlega gegnsýrt af spillingu og ótta.

Það er ömurlegt að verða vitni að þeim ótta sem hér ríkir meðal almennings. Margir þora hreinlega ekki að taka sér stöðu vegna óttans við að fá á sig stimpilinn að vera á móti stjórnvöldum. Hvar hafa nemendur háskólanna verið..vanalega eru það þeir sem þyrpast fyrstir út á göturnar í andófi gegn spillingu og valdníðslu ráðamanna. Núna er loksins lífsmark þar eftir hundrað daga.. og margir listamenn segjast ekki vilja vera með af ótta við að fá á sig stimpil?? Listamennirnir sem eiga að vera samviska þjóðar og talsmenn.

Stimpil um hvað?? Að taka sér stöðu gegn óréttlæti og arðráni heillar þjóðar??

Hvað er eiginlega búið að gera við fólkið í þessu landi??  Við hvað eruð þið svona hrædd?

Vil samt þakka Einari Má fyrir frábæra pistla sína og ræður. Hann þorir.

En það er líka upplyftandi að sjá og heyra alla þá sem eru að vakna til vitundar og finna samstöðuna og samhuginn meðal þeirra sem þora að standa með sannfæringu sinni og réttlætistilfinningu. Og trúið mér. Á endanum munum við velta valdinu og byggja hér betra og heiðarlegra samfélag á okkar forsendum. Okkar almennings.

En við verðum að standa saman og verða fleiri og fleiri og þannig verðum við sterkari og sterkari. Láta ekki smáatriðin þvælast fyrir okkur og sundra..heldur finna samtöðuna í aðalatriðunum og því sem við getum verið sammála um. Að koma þessu liði frá!!!

Sjáumst á Austurvelli á þriðjudag klukkan 13.00 velklædd fyrir 3ja tíma partý..heitt kakó og súpur á brúsa og látum velhvílda alþingismenn og ráðamenn heyra hvað okkur finnst um FJARVERU  þeirra Á ÖGURSTUNDU. Hvergi í heiminum myndu ráðamenn fara í frí meðan þjóðarskútan væri að sökkva. SKÖMM skulu þeir hafa.

Hvað ætli fari í gegn um huga þeirra þegar þeir sitja í kirkjunni fyrir setningu alþingis?

Boðorðin? Kaup og sala á syndaaflausnum? Hvort það sé rétt að almættið sé alsjándi og sumt verði aldrei falið? Að allt muni að lokum koma í ljós?? Er það sem þau eru svona hrædd við? Að allt muni koma upp á borðið. Og muldra þau þá í hljóði...Guð hjálpi okkur?

Syndir þeirra eru svo stórar og þungar að þær hafa nú sligað heilt þjóðfélag og lagt það í rúst.

Þú skalt ekki ljúga. Þú skalt ekki stela.

Og eitt boðorð skulum við hér og nú búa til fyrir þetta fólk.

Þú skalt ekki setja þinn eign hag eða flokks þíns ofar hagsmunum þjóðar.

Vona að presturinn komi því inn í hjarta þeirra að syndaflausnir verða ekki keyptar og að þegar ráðamenn og embættismenn loks iðrast gjörða sinna muni verk þeirra sýna að þeim sé alvara. . Hættum að hlusta á þá og horfum bara á verkin. Þau tala fyrir þá sannleikann.

Vona að presturinn muni eftir að blessa okkur sem fyrir utan stöndum. Ekki veitir af á þessum síðustu og verstu. Hvenær ætla svo prestarnir að standa upp með þjóð sinni gegn rammspilltum valdhöfum? Ætlar einhver að rétta okkur hjálparhönd?

Sjáumst á þriðjudag!!! Gerum stærstu mótmæli sögunnar á Austurvelli um leið og við förum í nokkurra klukkustunda verkfall. Í guðanna bænum ekki láta þig vanta.

Þessa þjóð vantar þig!!!


Næsta síða »

Höfundur

Katrín Snæhólm Baldursdóttir
Katrín Snæhólm Baldursdóttir

 Maddama kerling fröken frú Katrín Snæhólm. Hef áhuga á öllu milli himins og jarðar og telst þá hvoru tveggja með. Himinn og jörð.

 

kbaldursdottir@gmail.com

 

 

 

 

 

Heimsóknir

Flettingar

  • Í dag (19.3.): 1
  • Sl. sólarhring: 2
  • Sl. viku: 9
  • Frá upphafi: 310875

Annað

  • Innlit í dag: 1
  • Innlit sl. viku: 9
  • Gestir í dag: 1
  • IP-tölur í dag: 1

Uppfært á 3 mín. fresti.
Skýringar

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • ...xoqlinc
  • ...x-o-
  • ...katrin_mynd
  • ...peru_3
  • ...peru_2
  • ...peru_786202
  • ...peru
  • ...usturv_llur

Innskráning

Ath. Vinsamlegast kveikið á Javascript til að hefja innskráningu.

Hafðu samband