Fiskar og fransbrauð

í dag fórum við öll í yndislegan göngutúr og gáfum fiskunum brauð. Ha fiskunum? Meinarðu ekki öndunum?

Nei við fórum og gáfum fiskunum brauð. Franskbrauð.

Þetta er eitt það skemmtilegasta sem ég hef gert. Eftir að hafa gengið eftir skógarstíg upp á hæðina þar sem golfvölurinn er í St Johns þorpinu litla þar sem Karen og Steve búa, stoppuðum við á brú sem liggur yfir lestarteinana. Biðum þar eftir hraðlestinni og fundum hvernig hvert einasta líffæri nötraði í líkamanum þegar hún brunaði undir okkur og brúnna. Höfðum ekki hugmynd um að á svipuðum tíma varð jarðskjálfti hér uppá 4 komma eitthvað á richter!

Síðan héldum við göngunni áfram þar til við komum að stórri og fallegri tjörn sem er þarna við golfvöllinn. Flott tré og allt í blóma. Og fiskar sem borða brauð og eru svo gráðugir í það að þeir reka trýnið upp úr vatninu og slást um brauðbitana.

Þeir eru svona a.m.k 30 cm langir og nokkuð stórir og galopna munninn og synda næstum á land til að fá sér franskbrauð. Supu hveljur og slurpuðu og lætin voru svo mikil og gusugangurinn. Slagurinn um brauðið viðgengst greinilega ekki bara hjá manninum og öndunum.

Þetta fannst mér sko sniðugt og skemmtilegt. Hef bara aldrei séð það fyrir mér að gefa fiskum brauð. Eins gott að Jésú vini mínum datt það ekki í hug þegar hann mettaði 5000 manns með tveimur fiskum og fimm brauðum. Hvað ef hann hefði bara gefið fiskunum brauðið?

Bara yndislegur dagur og Frú Alice Þórhildur ömmubarn var auðvitað miðpunkturinn þó hún sé hvorki farin að borða brauð né fisk. Drekkur bara móðurmjólkina og dafnar vel.

Svo er krikketið í fyrramálið. Það tók mig langan tíma að læra að halda mér vakandi yfir þeim leik og skilja hvernig hann er leikinn. Núna er ég orðin svo flink og sit settleg í grænum veiðistól alla sunnudagsmorgna og kinka kolli með virðulegum viðurkenningarsvip og klappa hefðardömulega á réttum stöðum fyrir batti og bóli. Mér er sagt að ef við værum svo heppin að krikketleikirnir væru í eftirmiðdaginn tilheyrði að borða gúrkusamlokur og drekka kælt hvítvín með. Við fáum bara kaffi því við erum fyrirhádegiskrikketerar.  Kaffið er ógeð en hæfir vel morgninum.  Verð að muna eftir nýja skræpótta sumarhattinum mínum með stóru börðunum. Svo smart, og ég tala nú ekki um ef maður er með sólgleraugu líka. Eins og auðkýfinguafrú.

 Alltaf gaman að sjá strákinn sinn spila og þeir eru auðvitað svo sætir þessir kútar í öllu hvítu.  Örugglega ekki verið mamman sem hannaði skjannahvítan búning fyrir stráka til að spila í leik sem gengur að mestu út á það að henda sér í grasið og renna sér fast þar til allt er vel grænt og brúnt. Engin smá vinna að þvo og gera gallan hvítan aftur!

Jæja...ef mig dreymir Jésú í nótt ætla ég að spyrja hann útí þetta með fiskana og brauðin. Vonandi er eitthvað frábært að frétta frá himnum og ég læt ykkur vita ef svo er.

Night night...

 

 

Athugasemdir

[Guðríður Haraldsdóttir, 28.4.2007 kl. 22:45]

Ég náttúrlega stoppaði við þetta með vonda kaffið! Hefur þú ekki einu sinni Starbucks í nágrenninu? Sá staður hefur oft bjargað kaffilífi mínu, t.d. í Bandaríkjunum. Knúsaðu sætu fjölskylduna þína frá mér.

[Katrín Snæhólm Baldursdóttir, 28.4.2007 kl. 22:51]

Þegar við erum með "game away"...erum við vanalega einhversstaðar lengst úti á túnum og mömmurnar bjóða uppá lapþunnt neskaffi með undanrennu útí og alveg ægilega bragðvont. Jamm knúsa familíen frá þér Gurrí mín.

[Hrönn Sigurðardóttir, 28.4.2007 kl. 22:55]

knús til þín

[Gerða Kristjáns, 28.4.2007 kl. 23:51]

Helgarkvitt

[Kristín Katla Árnadóttir, 29.4.2007 kl. 09:00]

Ég hef nú aldrei vitað annað eins og þessa fiska

Og hvað er málið með þessa búninga, SKJANNAHVÍTIR issss ekki myndi ég nenna að þvo þetta.

[Ásthildur Cesil Þórðardóttir, 29.4.2007 kl. 10:08]

Mér synist fiskarnir vera Koj eins og ég er með í tjörninni minni.  Þeir eru skemmtilegir.  Skil þig vel með hvítu búninganahehehe... Annars hefur þetta verið dýrðar labbitúr Katrín mín.

[Jenný Anna Baldursdóttir, 29.4.2007 kl. 11:55]

Það er rétt Katrín það hefur ekki verið mamma sem hannaði búningana.  Takk fyrir frábæran pistil.  Smútsj.