Slétt, brugðið, mér er brugðið og það er ekkert slétt né fellt í þessu þjóðfélagi.

Hér sit ég í hlýjunni við ljóstýru og prjóna af kappi.  Ég er að prjóna mér svarthvítan yrjóttan mjúkan trefil sem á að halda á mér hita í öllum mótmælunum sem framundan eru.

Skjaldborgin utan um Alþingi í dag klukkan 12 á hádegi, Mótmælin á Austurvelli  n.k laugardag og svo mótmælin mánudaginn 1. des á Arnarhóli klukkan 15.00   Eins gott að eiga góðan trefil fyrir allar þessar útisamkomur með vaknandi íslendingum sem vilja ekki láta koma fram við sig eins og fífl lengur.

Það er eitthvað svo róandi og gott við það að prjóna.  Það ólgar í maganum á mér byltingarúmba og hjartað slær taktinn við lýðræðisþránna og ég nota tímann til að láta hugann reika og hugsa mitt. Slétt brugðið, slétt brugðið.  Vinkona mín í englandi hringir reglulega til að athuga hvort ég hafi nokkuð verið handtekin. Hún hefur áhyggjur af þessu brölti mínu og segir það alvöru mál að reyna að koma ríkjandi stjórnvöldum frá. Ég brosi bara góðlátlega út í annað og segi henni að það sé engin hætta á að svona friðsöm húsmóðir eins og ég verði tekin af löggunni....ég standi bara með mitt mótmælaspjald og mótmæli friðsamlega þó það ólgi í mér óréttlætistilfinningin og reiðin yfir því hvernig farið hefur verið með þjóðina mína og mig. 

Hún segir að þeir safni af manni myndum og geymi..skrái vel og vandlega hverjir séu í andstöðu og hljómar bara eins og spennandi söguþráður í tékkneskri byltingarbíómynd.

Svo heyri ég af því að sumum bloggum sé lokað vegna tengsla þeirra við kjosa.is, Bjarni Harðar talar um ósýnilega valdaklíku á bak við framsóknarflokkinn sem stjórni þingmönnum og Sigurður Bankstjóri er sveittur í Lúx að reyna að kaupa og koma undan skilst mér. Leyndóin farin að leka út í samfélagið og spillingin augljósari með hverjum deginum og stjórnin situr sem fastast og ætlar engu að breyta...hlær með hroka að fólkinu og kallar það "ekki þjóðin".

Slétt brugðið, slétt brugðið. Eins gott að eiga góðan hlýjan trefil fyrir verkefnin framundan. Þau eru mikil og mörg og ein svona húsmóðir skiptir máli til að vekja upp lýðræðið..rétt eins og þú. Hver og einn sem skipar samstöðuna skiptir miklu máli. Svartur og hvítur yrjóttur trefill... það er gott að finna ylinn um hálsinn því nógu oft fer ískaldur hrollurinn niður eftir bakinu  þegar grímurnar falla og hið raunverulega andlit valdaklíkunnar kemur betur og betur í ljós.  

Slétt brugðið..slétt brugðið..

 

Athugasemdir

[Ásdís Sigurðardóttir, 26.11.2008 kl. 09:45]

Bara gott að prjóna, ekki spurning. Hafðu það gott kæra Katrín

[Jenný Anna Baldursdóttir, 26.11.2008 kl. 09:55]

[Heiða B. Heiðars, 26.11.2008 kl. 10:14]

Æi Kataskata....þú ert eitthvað svo yndisleg!

Kaffi eftir skjaldborg í dag?

[Katrín Snæhólm Baldursdóttir, 26.11.2008 kl. 10:22]

Já heitt kaffi eftir Skjaldborgina.

[Ía Jóhannsdóttir, 26.11.2008 kl. 10:24]

[Heiða B. Heiðars, 26.11.2008 kl. 10:33]

Sjáumst ;)

[Soffía Valdimarsdóttir, 26.11.2008 kl. 11:28]

O já - að prjóna er eitthvað það mest sefandi og gefndi sem hægt er að hugsa sér.

[Sigrún Jónsdóttir, 26.11.2008 kl. 16:44]

Þið eruð flottar ungar konur, þið Heiða

[Ragnhildur Jónsdóttir, 26.11.2008 kl. 17:58]

Eins gott að halda á sér hita og nauðsynlegt að hafa ljós Handavinna er eiginlega besta sálfræðimeðferð sem til er, held ég fram Gangi þér vel með spjald í hönd í kuldanum. Ég er með ykkur á Austurvelli í huganum og hjartanu og set ljós í gluggann minn.

[Guðný Anna Arnþórsdóttir, 26.11.2008 kl. 21:58]

Gangi þér vel, elsku prjóna- og athafnaskáld (prjónaskáld...gott orð..?) - og gangi OKKUR öllum vel, for that matter. Hvílíkir tímar, hvílíkar hugsanir, hvílík endurröðun. Þarf samt að raða ENN betur og réttlátar.

[Aprílrós, 26.11.2008 kl. 22:06]

prjóna prjóna prjóna, gangi þér vel að prjóna kona góð. ;)

[www.zordis.com, 26.11.2008 kl. 23:47]

Skáldleg prjónakona ... zú ert frábaer og gaman ad lesa faerslurnar zínar.

Um ad gera ad trefla sig upp á köldum stundum. Ég set ljós í baráttuna.

[Rakel Sigurgeirsdóttir, 27.11.2008 kl. 00:48]

Já, þú kannt að orka á tilfinningarnar og skapa stemminguna með skrifunum þínum Ég var eiginlega farin að finna fyrir sömu tilfinningum í hjarta og maga í lok lestursins eins og þeim sem þú lýsir í byrjun. Hver getur það nema magnaður penni Þú ert líka mögnuð frelsishetja!

Ég er búin að leita á netmiðlunum af einhverjum fréttum af skjaldborginni en hef ekkert fundið. Vona að af þessu hafi orðið því miðað við það hvernig ríkisstjórnin öslar og göslast áfram þá veitir ekki af að sýna henni framan í óánægða kjósendur og það helst daglega!!

[Ásthildur Cesil Þórðardóttir, 27.11.2008 kl. 01:50]

Get ekki prjónað elskuleg mín, vegna vöðvabólgu, en ég get rifið kjaft og það ætla ég að gera meðan ég hef kjaft til að rífa.