Good Morning you lovely creatures

Þegar ég vakna ætla ég að hugleiða inn í daginn áður en ég hreyfi tærnar og muna draumana mína. Líka sem tilheyra þessari veröld.

Svo ætla ég að ganga þar til ég kem að tjörn og spegla mig í vatninu og muna eftir að lindin er tær og djúp alveg eins og sálin í okkur konunum. Mönnunum.

Þegar ég er búin að vera svona andleg eitthvað og fögur helli ég uppá kaffi og fæ mér bloggferð.

Fer svo í raunveruleikadragtina og skrifa undir pappíra sem breyta lífi mínu. Bölvuð biðin á enda. Ég var ekki að blóta bara nota orð um bölv.

Síðan geng ég léttstíg inn á kaffihúsið mitt og horfi illilega á einhvern ef einhver er í Rauða sófanum mínum við vegginn með útsýninu. Fólki líkar ekki illileg augnaráð beint á þriðja augað og forðar sér og ég drekk kappúsínó með mínum elskaða og reyki pjattrófulega Mintur. (Menthol sígó)

Spái hvað ég ætla að hafa í kvöldmatinn og stoppa hjá leiðinu í kirkjugarðinum sem liggur upp að bílastæðinu og blessa í huganum 3 síðustu manneskjurnar sem voru brenndar á báli hér í bænum. Hugsa um hvort ég hefði ekki þótt nægilega skrítin til að vera brennd af fólki með litla heila og köld hjörtu.

Muna að leita af kuldaskónum í bílskúrnum ef það snjóar aftur svona mikið í nótt. Bara vetur konungur mættur og trén í fallegum hvítum vetrarkápum. Flottara en allar tískusyningarnar í París til samans. Svo allt þetta megi nú verða raunveruleiki minn á morgun er best ég fari að sofa núna. Night night.

 

 

Athugasemdir

[Jón Steinar Ragnarsson, 9.2.2007 kl. 07:16]

Já maður speglast vel í bloggtjörninni hvort sem hún er gruggug eða tær. Hér er allavega tær gloppa og sést til litfagurra steina.

[Guðríður Hrefna Haraldsdóttir, 9.2.2007 kl. 08:50]

Megi dagurinn þinn verða svona eða jafnvel enn betri! Gaman að koma í heimsókn til þín á morgnana.  Eigðu frábæran dag!

[Katrín Snæhólm Baldursdóttir, 9.2.2007 kl. 21:16]

Veistu að það var bara í morgun sem allt small saman....LOKSINS!!!

En húsið er ekki það sem ég vænti en hef bara ekki meiri tíma. Stundum verður maður að láta undan. Var búin að finna arineldinnn. trégólfin og stúdíóið...dúkkuhúsið í garðinum og fallega krúttlega eldhúsið en það varð að fara af því að einn aðili var ekki að gera sitt.

En ég mun umbreyta slottinu í mitt og gera það besta úr öllu eins og mín er von og vísa. Á endanum verður allt eins og það skyldi vera. Takk fyrir góðar óskir.