Stígvél eru nauðsynleg...nema kannski í baði í London.

Það þurfa allir að eiga góð stígvél. Ég á engin stígvél og hef ekki átt í áratugi. En ætti kannski að fá mér rósótt bleik og græn svo ég geti farið í göngur á blautum engjum eða vaðið drullu og leðju í skóginum. Margt sem maður getur misst af ef maður á ekki góð stígvél.

Fór til London í dag í heimsókn og fékk að fara í bað og steinsofnaði. Húsráðandi hvatti mig eindregið að prófa nýja baðpúðann sinn sem væri svooo þægilegur . Maður smellir honum á baðið og hann lagar sig eftir höfðinu enda fylltur með frauðbaunum og maður getur bara slakað á og þarf ekki einu sinni að spá í að halda hausnum upp úr vatninu. Enda steinsofnaði ég og hafði ekki grænan grun um hvar ég var þegar ég vaknaði. Horfði bara út um gluggann og hvernig sólargeislarnir stirndu á hömruðu glerinu og allt var eitthvað svo rólegt og blautt og hlýtt og framandi og trén bærðust aðeins og vörpuðu skuggum á vaskinn.

Og ég vissi ekkert.  Ekki hvar ég var eða hver ég var. Ekki hugmynd hvað ég væri að gera í baði og hvers vegna ég væri þarna yfir höfuð. Það er kannski ekki góð hugmynd að fara í bað þar sem maður þekkir ekki til. Og leggja sig í leiðinni. Tók mig töluverðan tíma að koma til sjálfrar mín og muna hvað var hvað. Það var Nivea dósin í glugganum sem kveikti á mér og ég fór að muna aftur.  Að ég væri kona í baði í ókunnu húsi í London. Nývöknuð kona í baði í London.

 Þetta var samt alveg indælt og draumkennt ástand. Að vera ekkert og hvergi í smá tíma.

 

 

Athugasemdir

[Jenný Anna Baldursdóttir, 6.3.2007 kl. 21:25]

Örugglega kærkomið afslappelsi fyrir þig Katrín mín.  Gott að fara í bað og slaka á sama þótt það sé í "ókunnugu húsi í London"

[Ásthildur Cesil Þórðardóttir, 6.3.2007 kl. 21:41]

Þetta hlýtur að hafa verið hinn eini sanni draumur í dós

[www.zordis.com, 6.3.2007 kl. 21:51]

Frábært að ná að slaka svona á ... Guð hefur legið á glugganum og sent þér geisla inn, hann hefur gefið þér tíma og rúm til að losa þær þúsundir hugsanan sem elta þig á röndum.  

Ég hef ekki átt stígvél í áraraðir, gekk berfætt í sandölum í snjónum og það á vel við mig að vera berfætt Spáni á 

[Guðríður Hrefna Haraldsdóttir, 6.3.2007 kl. 22:43]

Ummmm, yndislegt, verð að fá svona púða í nýja baðið og bjóða þér í nuddbaðbombubað hjá mér þegar þú kemur í næsta mánuði til að montrassast með barnabarnið! Hehhehe, mikið verður gaman að sjá þig.

[Katrín Snæhólm Baldursdóttir, 6.3.2007 kl. 23:02]

Já af hverju heldur fólk að ég sé að koma í heimsókn til þeirra. Kaffi og spjall???

Ó nei. Almennilegt bað og lítill lúr er allt sem ég sækist eftir. Láttu renna Gurrí og bombur eru alltaf góðar nema þær sem eru fullar af glimmeri.

[Doddi - Þorsteinn G. Jónsson (IP-tala skráð) 6.3.2007 kl. 23:20]

Frábært að heyra þetta, Katrín. Hins vegar á ég enga svona vini sem ég get stundað baðferðir til ... og ég er bara með sturtu ... en mikið rosalega skil ég þig vel, (öfunda pinku lítið líka), ... þessi tilfinning er æðisleg: að vera ekkert og hvergi í smá tíma.

Hlýjar kveðjur frá Akureyri, D. 

[Svava frá Strandbergi , 6.3.2007 kl. 23:26]

Gott að þú náðir að slaka svona vel á í baðinu. Ég fer yfirleitt í sturtu en mér finnst yndislegt að setja stundum slökunarolíu í baðvatnið. Helst að slökkva ljósin líka og hafa kveikt á kertum og svo rólega músík á.

[Jón Steinar Ragnarsson, 6.3.2007 kl. 23:58]

Já, Aqua Vitale. Lífsvatnið, sem endurnærir sál og líkama. Ekki ættu svona bombur og baunapokar að spilla.  Ég get bara boðið upp á sturtu og það er stórvarasamt að sofna í þeim.

Annars fyllist ég öfund yfir allri þessari munúð, sem hér flýtur um síðuna. Eitt sinn fór ég í svona baðkar á jammárunum, eftir erfiðan vinnudag og með afar afar afar ódýrt hvítvín með.  Ég ætlaði á ball en vaknaði einhverjum tímum seinna í ísköldu vatni með kvef og fílshúð. Ég fór því bara í rúmið og horfði á þjáningarbróður minn fílamanninn á videó.

[Jenný Anna Baldursdóttir, 7.3.2007 kl. 13:24]

Elsku Katrín á ekki að fara að kíkja við hjá sinni?  Sakna þín