Heft peningastreymi út af skítugum ofni og opinni klósettsetu. Dauðþreytt en alsæl húsmóðir.

Hrikalegt eldhúsið hjá mér í dag eftir að hafa steikt beikonið, spælt eggin og kreist allan þennan ávaxtasafa. Ég er bara svo heppin að kallinn minn er svo hjálpsamur og skilningsríkur þegar mér fallast hendur yfir húsmóðurstörfunum. Þá tekur hann um axlir mér og telur í mig kjarkinn til að halda áfram. Að ég sé einmitt svo flink í öllu svona og ætti að vera þakklát fyrir að hafa einhverja hæfileika. Það séu nú ekki allar konur svo heppnar svo ég varð glöð og byrjaði á fullu að þrífa.

 

Og fyrst ég var byrjuð ákvað ég að þrífa bakaraofninn líka. Það er sko verk sem ég fresta eins lengi og ég kemst upp með. En svo sagði einhver kona í útvarpinu einu sinni að ef maður þrifi ekki ofninn vel og vandlega myndi maður verða blankur eða peningastreymið snarminnka til manns. Ég bara þorði ekki öðru en að skrúbba og skrúbba ofninn. Rosalegan tíma og krafta þarf í það ansans verkefni. Var reyndar sniðug og spreyjaði einhverju töfraefni á allar grindurnar og henti þeim svo í uppþvottavélina og bíð núna spennt eftir árangrinum. Kallinn er svo yndæll. Kallar fram hvatningarorð í hverju hléi í fótboltanum og brosir uppörvandi til mín þegar hann kemur og nær sér í meiri bjór. Það er sko munur að vera vel giftur. Gvöð..svo mundi ég eftir öðru sem maður getur sparað sér peminga á...LOKA klósettsetunni. Ef hún er alltaf opin fjúka allir peningar í burtu. Feng shui fræðin. Ég hentist upp á loft og viti menn! Setan uppi!!! Er það nema von að reikningarnir hrúgist upp.  Ég vona að hún detti á sprellann á þessum herramönnum sem hér búa svo þeir muni eftir að setja hana niður sjálfir næst. Notaði tímann vel og þreif klóið í leiðinni svo nú er það glansandi fínt.

 

Já svona er nú lífið gott á laugardögum. Ég get ekki beðið eftir að komast í bankann á mánudaginn og gá hvað ég græddi á öllum þessum þrifum. Bæði ofninn tandurhreinn og klósettsetan niðri. Ég límdi hana niður með galdragripi bara svona til að fyrirbyggja frekari blankheit. Sé fyrir mér feitan bankareikning og hef lofað sjálfri mér að þrífa ofninn daglega núna og taka ekkert límið af klósettsetunni. Við getum bara migið í koppa eins og fólk gerði hérna áður fyrr. Erum ekkert of góð til þess.

Ahhh...ég var að tékka á skúffunum og grindunum í uppþvottavélinni. Tandurhreint og glimrandi skínandi hreint allt saman. Núna tekst þetta hjá mér. Núna getur ekkert komið í veg fyrir að ég verði milljónerakona.  Æ ég er svolítið þreytt eftir öll lætin og skrúbbin og ætla aðeins að leggja mig og muna að biðja til Guðs í leiðinni að mér verði fyrirgefin öll lygin sem ég er búin að ljúga upp á minn betri helming í þessum pisitli.

Amen.

Ég bara varð að setja inn gamla færslu svo ég færi ekki að blogga um minn raunverulega dag eins og hann var...jeminn eini hvað ég get sundum bara ekki skilið það sem sagt er við mig...haldiði ekki að ég hafi bara mætt á....jussumía. Segi frá því síðar þegar ég er búin að jafna mig smá. Ég hefði betur verið heima hjá mér að þrífa.

 

Athugasemdir

[Hulda Bergrós Stefánsdóttir, 1.9.2007 kl. 17:24]

Fannst þessi færsla eitthvað kunnuleg....var að spá í hvort þetta hefði verið "minn" dagur

[Jenný Anna Baldursdóttir, 1.9.2007 kl. 18:01]

Endurnýting er af hinu góða. Muhaha

[Guðríður Hrefna Haraldsdóttir, 1.9.2007 kl. 18:15]

Frábært, Óli er svo hjálpsamur. hahhahaha ... heimta samt skýrslu dagsins þótt síðar verði!!!

[Ívar Pálsson, 1.9.2007 kl. 19:04]

Feng Shui svínvirkar! Stóru samningarnir komu þegar ég þreif fiskabúrið. Tæmdu geymslurnar. Gefðu gömlu fötin. Listaðu upp allar skuldir. Lestu bókina "Clear your clutter with Feng Shui", sem breytir lífi manns. Þú ert á réttri leið, enda í Satúrnusartímabili.

[Inga Helgadóttir (IP-tala skráð) 1.9.2007 kl. 19:27]

Hahahahaha, bráðskemmtileg frásögn.  Vona það verði hrúga á bankareikningnum á mánudaginn, af peningum meina ég.  Þú átt það skilið þó ekki sé nema fyrir þessa frásögn.

[Kristín Katla Árnadóttir, 1.9.2007 kl. 21:51]

haha frábær frásögn ég var að reyna að steikja beikon og egg allt kerfið fór af stað hjá mér. en þú er yndisleg . Katrín mín.

[Marta B Helgadóttir, 1.9.2007 kl. 22:50]

Á námsárunum í gamla daga var ég oft illa blönk. Við tókum okkur saman 3 nágrannakonur, ein frá Kolumbíu, ein ensk og ég og tæmdum geymslurnar og héldum garðsölugjörning, í sólskini með fulla risastóra könnu af íste handa gestunum. Varð skemmtilegt partý og bankareikningurinn fitnaði jú eitthvað smá.