Til þjónustu reiðubúin!

Núna verður að byggja brú á milli alþingis og almennings og tengja þarna á milli með sterkum tryggðarböndum og trausti.

Að fólkið eigi sína fulltrúa sem eru þarna eingöngu í þeim tilgangi að þjóna sem best og mest hagsmunum þjóðar en ekki flokks.

Ég hef verið að velta fyrir mér þessum hugtökum..háttvirtur þingmaður og hæstvirtur forseti alþingis og hef komist að þeirri niðurstöðu að mér hugnast ekki svona titlatog sem setur einhverja á hærra plan en aðra. Fyrir mér eru þingmenn ekkert annað en þjónar almennings og ættu því ekki að vera ávarpaðir sem háttvirtir eða hæstvirtur. Það er eitthvað svo elítulegt og passar engan veginn inn í þann nútíma sem við núna lifum í og sérstaklega ekki eftir allt sem á undan er gengið og virðing fyrir alþingismönnum farið mjög þverrandi. Þetta verður næstum eins og hæðnistitill miðað við það álit sem margir hafa á alþingismönnum núna.

Ég er alltaf að grúska í bókunum og í einni þeirra fann ég eftirfarandi orð sem ég ætla að leyfa ykkur að lesa með mér og íhuga. Þau eru úr Bókinni hans Gunnars Dal, Þriðja árþúsundið.

 

Góðir stjórnendur.

Það er aðeins til ein gerð af mönnum sem geta talist góðir stjórnendur. Það eru þjónar. Menn stjórna vel með því að þjóna fólki. Þessir menn hafa oft trúarlega afstöðu eða hafa ákveðna hugsjón að leiðarljósi. Sumir þeirra hefja jafnvel hvern dag á bæn eða hugleiðslu um að þeir megi láta gott af sér leiða. Það er erfitt að vera stjórnandi. Það er ekki auðvelt að horfast í augu við tíðarandann og svara spurningunni.."Hvað leiðir til góðs og hvað leiðir til ófarnaðar.

Lélegir stjórnendur spyrja aldrei þessarar spurningar og láta sér svarið í léttu rúmi liggja. Þeirra leiðarljós er framinn og persónuleg stærð. Greindum tækifærissinnum vegnar oft vel þó að þeir svíki sitt fólk og skilji það eftir í eymd sinni. Braut raunverulegs stjórnanda er ekki aðeins erfið, hún er líka oft hættuleg. Hann veit það en er hvorki kominn til að vinna eða tapa heldur til að axla ábyrgð.

Auðvitað eiga alþingismenn og konur að vera þjónar almennings og mér myndi alveg hugnast að ávarpið væri á þennan hátt t.d ..Kæru samfélagsþjónar!

En svo að lokum hvet ég ykkur til að kjósa samkvæmt hjarta og innstu sannfæringu ykkar því þannig verður útkoman fyrir þjóðina rétt.

Við verðum á Laugaveginum í dag með heitt á könnunni og það ætla landskunnir tónlistarsnillingar að koma og taka lagið. Kosningavakan okkar verður svo í Iðnó annað kvöld og þangað eru allir hjartanlega velkomnir. Við erum með fiðrildi í maganum fyrir morgundaginn og þá góðu tilfinningu að við höfum nú gert allt sem í okkar valdi stendur til að kynna Borgarahreyfinguna og frambjóðendur okkar fyrir fólkinu og nú er það í ykkar höndum að kjósa það sem ykkur hugnast best.

Eigið góðan og yndislegan dag....ég set inn nokkrar appelsínugular myndir í tilefni dagsins.

Augu heimsins hvíla á okkur núna

Við vorum með framboðskynningu á Borgarspítalanum í vikunni og þar var hópur frá London að taka upp efni og fylgjast með því sem hér er að gerast.  Þau voru nýkomin til landsins til að gera heimildamynd um kosningarnar hérna og telja að þetta séu einar mikilvægustu kosningarnar í heiminum i dag þar sem við erum fyrsta landið til að fara í kosningar eftir svona hrikalegt hrun.

Þau tóku við mig viðtal og það var mjög gaman að spjalla við þau. Þau eru líka sérstaklega að skoða hvernig framboð það eru sem spretta upp í svona umhverfi og aðstæðum eins og hér hafa verið síðan í október og hvert stefnan sé tekin. Það eru fjölmargir erlendir fréttamenn staddir hér núna og fylgjast grannt með öllu sem við erum að gera..bæði frambjóðendur sem og kjósendur.

Svo ég hvet ykkur til að vera almennileg, GÓÐ OG SÆT EINS OG VANALEGA....kannski við náum að bæta ímynd okkar fyrir umheiminum sem ég er eiginlega alveg viss um að við gerum, því íslendingar eru upp til hópa heiðarlegt og gott fólk og á hreint ekki skilinn þann stimpill sem hefur verið komið á okkur af örfáum manneskjum sem kunnu ekki fótum sínum forráð og gátu hvergi hamið græðgi sína. 

Það var mikið um að vera á kosningaskrifstofunni okkar í gær og greinilegt að nú þegar Borgarahreyfingin er orðin mjög raunverulegur valmöguleiki með að mölbrjóta hinn illræmda 5% múr að þá er fólk virkilega að skoða það og margir jafnvel að ákveða að kjósa okkur. 

Ég segi nú bara atkvæði greitt Borgarahreyfingunni er LIFANDI atkvæði en autt er dautt.

Þegar fólk spyr mig hvað það eigi að kjósa segi ég alltaf.."Maður á að kjósa frá hjartanu og út frá sinni innstu sannfæringu...þá verður útkoman rétt fyrir samfélagið.

a

Alls ekki  láta glepjast af glansmyndauglýsingum og fagurgala heldur horfa ískalt á verkin og dæma svo.

Og ég hvet þig líka til að gera það kæri bloggari.

Ekki hafði ég hugmynd um hvað þess vetur bæri í skauti sér þegar ég fór að mæta alltaf á Austurvöll í vetur af því að ég gat hreinlega ekki setið heima hjá mér og ekki mótmælt því sem hrundi yfir okkur og líf okkar allra.

Nú eru 3 dagar til kosninga og ég sit hér og skrifa ræðu sem ég ætla að vera með í sjónvarpinu annað kvöld. Það er óhætt að segja að maður læri eitthvað nýtt á hverjum degi og sé stöðugt að henda sér út fyrir þægindamörkin sín..en það er víst bara gott og hollt  og ekki síst þroskandi að gera það reglulega. Koningabarátta er einmitt kjörin fyrir svona þanþol..

Eigið góðan dag í rokinu og regninu...og munið að það er heitt á könnunni hjá okkur á Laugaveginum og volg vínarbrauð á bakka og heimurinn er að horfa á okkur öll!

www.borgarahreyfingin.is

xo

 

Þetta er nákvæmlega það sem við höfum fundið.....íslendingar vilja raunverulegar breytingar!

Mér hefur sjaldan fundist forsíða Moggans flottari en í morgun

O listinn með FJÓRA á þing miðað við nýjustu könnun Gallup. Myndi vilja segja margt og mikið en læt nægja að hrópa ferfalt húrra fyrir framboðinu sem var kynnt til sögunnar sem eitt af "vonlausu" framboðunum fyrir nokkrum vikum en er svo sannarlega bjartasta vonin í íslenskum stjórnmálum í dag.

 Og nú má ég ekki vera að því að blogga meira um þessa frábæru frétt því ég þarf að halda morgunverðarframboðsfund núna klukkan 9.00 upp á Höfða.

Það er ekki slæmt að fá svona góðan meðbyr inn í daginn. Það er eiginlega bara alveg æðislegt og hvetur okkur í Borgarahreyfingunni til enn frekari dáða.

www.borgarahreyfingin.is

 

 

O-listi fengi fjóra

Eigum við að kjósa með bundið fyrir augun?

 

 

 

 

 

 

 

 

 

 

 

 

 

 

  Á virkilega að bjóða kjósendum upp á þá vanvirðingu að ganga til kosninga án þess að aflétta leyndinni?

Það var leyndin  og blekkingarnar sem komu okkur í þá stöðu sem við erum í núna... Stjórnvöld vissu nákvæmlega hvað í stefndi en kusu að þegja um það og halda  blekkingarleiknum áfram.

Og nú tæpri viku fyrir kosningar er ljóst að leyndin mun áfram hjúpa fyrirætlanir og áform stjórnvalda.

Hver eru skilyrði Alþjóða gjaldeyrissjóðsins?

Hvert er raunverð á raforku til álveranna?

Hvað með bankaleyndina?

Hver er skuldastaða okkar og hvað á almenningur að taka á sig?

Almenningur í landinu á rétt á því að ganga að kjörborði upplýstur og vitandi um hvað atkvæði hans boðar raunverulega. Fjölskyldurnar eiga heimtingu á því að vita hvar þær standa  svo þær geti tekið mikilvægar ákvarðanir um líf sitt og framtíð. Annað er algerlega óásættanlegt.

Ég skora á ríkisstjórn og valdhafa að upplýsa okkur um þetta undir eins..annað er bara ekki boðlegt. Þessi þöggun og leyndarhjúpur sem umlykur allt í þessu samfélagi er ógnvekjandi og það á engin þjóð að láta bjóða sér slíka framkomu. Engin! Í Úkraníu fór fram opin umræða á alþingi og fyrir opnum tjöldum .annig að þjóðin var upplýst um hver skilyrði alþjóða gjaldeyrissjóðsins væru áður en nokkrar ákvarðanir voru teknar.

En hér fer allt fram á bak við luktar dyr og í einhverju leynimakki. En ekki mikið lengur.

Tökum höndum saman og kjósum leyndina burt.

www.xo.is

 

 

 

 

 

 

Litill tími..stutt blogg!

Dagarnir þjóta áfram og eru troðfullir af spennandi og krefjandi verkefnum enda bara ein vika til kosninga.  Fyrir þau ykkar sem viljið kynna ykkur stefnu Borgarahreyfingarinnar og kynnast frambjóðendum þá verðum við í Kringlunni daglega fram að kosningum og svo er auðvitað kosningaskrifstofan að Laugavegi 40 opin alla daga og alltaf heitt á könnunni.

Mig er hreinlega farið að dreyma í appelsínugulu og brest stundum í dúndrandi ræðuhöld í bílnum þegar ég er að koma mér á milli staða sjálfri mér til mikillar skelfingar og öðrum vegfarendum eflaust til undrunar..hehe.

Það gerist svo margt sniðugt á hverjum degi og það væri frábært að blogga um það allt, en eins og ég segi...svo lítill tími til að setjast niður og blogga nema helst eins og núna..seint um kvöld eftir langan dag og svo er að drífa sig af stað í morgunsárið og þess vegna er svefninn svo kær og vel metinn þessar stundirnar.

Kannski að næsta sunnudag hafi ég tíma til að fara yfir liðna daga og vikur...og hver veit hver staða konu verður þá?

Og ég velti fyrir mér fína og flotta planinu mínu sem ég sat við heilan dag að setja saman núna um daginn ...sem bíður nú ofan í skúffu og brosi með sjálfri mér þegar ég rifja upp þessi fleygu orð..

Life is what happens when you are busy making plans! Það var nefninlega akkúrat það sem gerðist hjá mér:)

Hafið það gott kæru bloggvinir og aðrir lesendur...en um leið og ég finn mér aðeins meiri tíma og þar til ég get skrifað almennilegt og langt blogg ætla ég að leggja fyrir ykkur spurningu sem hljóðar svona. "Hvar ætlar þú að setja Ð-ið þitt? 

Þetta er smá leikur og það kemur í ljós í næstu færslu hvað ég meina með þessu.

En auðvitað vona ég að sem flestir setji X-ið sitt við O

 

 

 

 

 

 

 

www.borgarahreyfingin.is

 

Borgarahreyfingin kemur inn í stökkum og bolar framsókn burt....

Mér segir svo hugur að við séum að brjóta 5% múrinn á landsvísu og þá getur allt gerst. Þá er ekki hægt að tala um að það þýði ekki að kjósa Borgarahreyfinguna því atkvæðin falli dauð eða sollis.  Ó nei,  það þýðir að það er kominn raunverulegur valmöguleiki fyrir þá sem vilja spillinguna burt og raunverulegt lýðræði!!!

XO

Mikið hlakka ég til að vakna í fyrramálið og halda áfram baráttunni sem hófst með krafti á Austurvelli. 

Mottóið mitt er...Nú bítum við í skjaldarrendur og bryðjum þakrennur og það fær ekkert stöðvað þetta afl okkar fólksins.

Byggjum brú inn á þing...Þjóðin á þing:)

Samfylking stærst

Draumalandið fyrir vaknandi þjóð...ekki hægt að sofa vært eftir áhorfið!

Við fórum nokkur saman að sjá Draumalandið í bíó og ég verð að segja að myndin snertir við manni. Sumir þurftu snýtiklúta í lokin og aðrir þurrkuðu tár af hvörmum. Hvet ykkur eindregið til að sjá myndina og taka vel eftir því sem þar kemur fram. Mjög vel. 

Foringjadýrkun er úrelt fyrirbrigði í nútíma samfélagi og við höfnum henni algerlega.

Borgarahreyfingin hafnar leiðtogadýrkun

Nýlega efld stjórn Borgarahreyfingarinnar hefur tekið til starfa og í kjölfarið sent frá sér eftirfarandi tilkynningu.

Borgarahreyfingin hafnar leiðtogastjórnmálum eins og þau hafa birtst hér á landi hvort sem um er að ræða undanfarna mánuði eða áratugi. Þess vegna hefur Borgarahreyfingin ákveðið að skipta ekki með sér verkum skv. hefðbundnum aðferðum í hlutverk formanns, varaformanns og ritara og nota ekki þá titla í starfi sínu.

Um yfirstandandi helgi eru haldnir landsfundir tveggja stærstu stjórnmálaflokka landsins. Almenningur þarf að sæta því að horfa upp á nánast stanslausa umfjöllun á starfsemi þessara flokka í öllum fjölmiðlum þar sem fyrirferð flokksleiðtoga og leiðtogakjörs varpar stórum skugga á þá málefnalega umræðu sem annars ætti að vera í landinu.

Landsfundir sem þessir og sú skefjalausa leiðtogadýrkun sem þeir upphefja er lýðræðinu ekki til framdráttar. Borgarahreyfingin – þjóðin á þing bendir á að það er einmitt leiðtogadýrkun af þessu tagi sem leiddi til þeirrar ömurlegu niðurstöðu að Alþingi varð óstarfhæft. Ríkisstjórn landsins hrökklaðist svo frá þegar vanhæfni þeirra “leiðtoga” sem ríkisstjórnarflokkarnir höfðu á að skipa kom berlega í ljós.

Stjórn Borgarahreyfingarinnar mun koma fram sem heild og meta það í hverju tilviki hver kemur fram sem talsmaður hennar, eftir því hvert tilefnið er. Þess vegna mun Borgarahreyfingin sýna mörg andlit í aðdraganda kosninganna. Í því skyni hefur Borgarhreyfingin skipað sér talsmenn sem munu skipta með sér hinu s.k. “leiðtoga” hlutverki sem gamaldags stjórnmál og fjölmiðlaumfjöllun kallar svo sterkt eftir.

www.xo.is

 

Borgarhreyfingin komin í 3.4% og er ekkert að hægja á sér og ég ekki heldur!

Það er búið að vera svo mikið að gera að ég hef ekki einu sinni getað bloggað eða hvílt mig almennilega og þess vegna er best að fara að halla sér og nota tímann meðan ég ligg á koddanum og skipuleggja vel næstu fjórar vikur með sjálfri mér og muna eftir að setja bloggið á listann svo það gerist ekki aftur að ég gleymi því.  Þetta eru bara svo spennandi tímar og breytingarnar liggja í loftinu. Ég finn lyktina af lýðræðinu og kjarki þjóðar sem er tilbúin að stíga skrefið og taka völdin í sínar eigin hendur.

Ég er með eina ferlega fína bloggfærslu í höfðinu en ég verð að spara hana þar sem hún gæti orðið eitthvað annað og meira en bloggfærsla. Kemur í ljós á mánudaginn.

Þangað til ætla ég að funda, safna meðmælendum fyrir Borgarahreyfinguna og fara í tvær fermingarveislur.

Já og svo ætla ég í framboð.

Hvernig líst ykkur á það að húsmóðir sem vaknaði upp með byltingu í blóðinu  og knýjandi þörf fyrir breytingar í hjartanu sl haust, kona sem barði saman pottum og pönnum og klæddist appelsínugulu þrátt fyrir allar fyrri yfirlýsingar um að hún væri sko ekki pólitísk bjóði sig nú fram til Alþingis? Sjáið þið ekki hvað ég myndi smellpassa þarna inn? 

Ég og hinir pólitíkusarnir alveg sveitt við að breyta kosningalögunum, setja stjórnlagaþing fólksins og auka lýðræðið um mörg hundruð prósent. Byggja grunninn að góðu framtíðinni sem ég trúi að bíði okkar ef við bregðumst ekki skyldum okkar og leggjum okkar af mörkum á hvern þann hátt sem við getum. Öll saman hvert og eitt einasta okkar með hæfileika, reynslu, getu og þekkingu til að leggja í púkkið.

Við förum fram með slagorðinu Þjóðin á þing og ég segi það og skrifa "Ég er þjóðin" eða a.m.k einn þrjúhundruðþúsundasti af henni og það ert þú sko líka:)

Og af því ég talaði um það hér fyrr í færslunni að ég væri ekki og hefði ekki verið pólitísk þá vil ég bæta því við að það stendur enda er ég algerlega þverpólitísk rétt eins og Borgarahreyfingin

xo.is

                                                                        

Orð dagsins eru skýrleiki og þoka....samt aðallega ÞOKA.

Eftir Borgarafundinn í gærkveldi er eitt alveg kýrskýrt í mínum haus. Valið sem við stöndum frammi fyrir er að hafa skýrleika eða þokukenndan svima...

Bjarni Ben hélt ræðu og hausinn á mér fylltist af þykkri dimmri þoku og alveg sama hvað ég reyndi náði ég engum þræði né innihaldi úr ræðu hans. Flestir aðrir í salnum upplifðu það sama..sumir gengu út, aðrir geyspuðu og nokkrir bara flissuðu og litu í kringum sig í forundran. Ef þetta er framtíðarleiðtogi Sjálfstæðisflokksins þá segi ég.....Pass!

Allir bara uppi á heiðum að týnast í þoku saman?

Þess ferskara og heiðskýrara  var að hlusta á Björn Þorra hæstaréttarlögmann flytja sína tölu þar sem hann talaði skýrt og á mannamáli um stöðuna og  uppskar þakklæti og mikið klapp. Fólk verður svo þakklátt þegar einhver getur tjáð sig af svona miklum skýrleika eins og hann gerði. Hins vegar var innihald ræðu hans sjokkerandi og ég hvet ykkur eindregið að lesa eða hlusta á hana á www.borgarafundur.org um leið og hún er komin þar inn sem vonandi verður sem allra fyrst!!!

Atli Gísla er líka svona skýr og skorinorður og á þakkir skildar fyrir að vera óþreytandi að reyna að leiða okkur um þessa spillingarfrumskóga sem þetta land er orðið. Hefði viljað fá hann sem dómsmálaráðherra.

Gylfi viðskiptaráðherra var svo kapituli út af fyrir sig.

Gerist eitthvað dularfullt með fólk sem virkar greint og gott þegar það fær valdamikið embætti eða ráðherrastöður? Maðurinn hélt því blákalt fram að þó að hér hefði orðið efnhagshrun þá þyrftum við ekki að hafa áhyggjur af því að félagslegt hrun myndi fylgja í kjölfarið??? Hvert mannsbarn getur séð að í kjölfar atvinnumissis og jafnvel missis heimilis fyrir utan þær mannlegu hörmungar sem fylgja innan fjölskyldna sem búa við slíkt ofurálag flokkast alveg örugglega sem félagslegt hrun?

Þegar heilbrigðis og menntakerfi dragast saman og öll þjónusta hins opinbera er í lágmarki og oft á tíðum mjög dýr. Ef ráðherra getur ekki séð samhengi í orsökum og beinum afleiðingum þá er verulega illa fyrir okkur komið. Ég beið bara eftir að hann segði þegar Björn Þorri áréttaði við hann að ástandið væri svo sannarlega skelfilegt félagslega fyrir þúsundir fjölskyldna eftir efnahagshrunið og ætti enn eftir að versna mikið..."Af hverju borðar fólkið ekki bara kökur?

Og þegar Gylfi kvartaði undan því að hann fengi sífellt sömu spurningarnar aftur og aftur þá var það einfaldlega vegna þess að svör hans voru hreinlega svo óskýr og loðin að fólk var engu nær!

Og bankarnir keyra gjaldþrotin hratt og vel í gegn og það er enginn afsláttur gefinn. Þegar ráðherrar eru spurðir um hvort ekki eigi að slaka aðeins á aðfararhörkunni segja þeir alltaf...Við höfum beint eindrægnum tilmælum til bankanna að gera það og taka vel á móti þeim sem eiga í verulegum erfiðleikum.  Málið er að það er bara ekki að gerast.

Gjaldþrotahrinan magnast bara með hverjum deginum og fólk fær engin grið sama hvað menn gala fagurlega opinberlega um að eindregnum tilmælum hafi nú verið beint..bla bla bla.

Ef ég væri ráðherra og hefði ítrekað beint tilmælum um breyttar verklagsreglur en enginn væri að hlusta á mig í  heila 5 mánuði væri ég löngu mætt til að berja í borð, sparka í stóla, arga mig hása og reka þá sem ekki hlýddu og ráða hæfara fólk í staðinn sem fylgdi tilmælum ríkistjórnar. Maður spyr sig..hvers lags djöfulsins málttleysi er þetta eiginlega???  Ef tilmælin virka ekki, ef bankamenn fara ekki eftir þeim itrekað ..þá bara skipar maðurinn með valdið embættismönnum kerfis að fara eftir settum reglum, vinna vinnuna sína eins og þeim er sagt eða hypja sig ella..ekki satt?

Og enn eru fjármagnsfyrirtækin að ræna bílaeigendur um hábjartan dag með hreint fáránlegum vinnubrögðum og okursmurningum á reikningum upp á hundruðir þúsunda svo tryggt sé að fólk sem er að missa bíla sína sitji uppi með himinháa reikninga  sem og eftirstöðvar og ekkert er að gert. Þar er eflaust líka búið að beina tilmælum til þessara manna að fara að hætta að  haga sér eins og ótamdir glæpahundar..ha?

Meiri þokan út um allt alls staðar...ég vona svo sannarlega að það fari að létta til og skýrleikinn verði allsráðandi.  Þetta samfélag er bara ekki hægt!

Já og eitt enn áður en ég anda rólegar....

Ef þetta þing vogar sér í langt sumarfrí á svona ögurstundum eins og þessi þjóð stendur nú frammi fyrir þá mun ég krefjast þess að þessar ládeyður verði bornar út og fái aldrei aftur að koma nálægt þinginu okkar. "Núna verða allir að leggjast á eitt og bretta upp ermar" segir þetta lið spariklætt í ræðupúlti og reynir að ná atkvæðum okkar með fagurgala og gjammi...Mitt ráð er.... Brettið sjálf upp ermarnar og standið vaktina þar til neyð þúsunda hefur verið afstýrt eða aðgerðir verið hafnar til bjargar fólkinu okkar og vogið ykkur ekki að fara heim fyrr en það er í höfn.

Við hin erum nefninlega búin að standa með uppbrettar ermarnar síðan hrunið varð og bíða eftir því að fá að vita hvað við getum gert. Við fáum bara engar upplýsingar um eitt eða neitt. Má ég svo  beina þeim tilmælum til ráðamanna að þeir fari nú að segja okkur satt um stöðuna svo við getum byrjað að takast á við vandann takk!!