Ég myndi sko taka mér stöðu með ykkur ef ég væri ekki hrædd um að fá sekt á bílinn minn...

....sagði kona ein í gær þegar við sem stóðum hönd í hönd kringum alþingishúsið..kölluðum til hennar að koma og hjálpa okkur að standa vörð um lýðræðið. Svo hljóp hún eins og fætur toguðu út á bílastæði. Ég næstum vonaði að hún hefði fengið eina feita á framrúðuna en svo hugsaði ég með mér að ég væri enginn stöðumælavörður.... þó ég sé hins vegar alltaf að taka mér stöðu hingað og þangað um bæinn!

Við vorum alveg að lengja á okkur handleggina um nokkra metra meðan við stóðum þarna í upphafinu og vantaði enn nokkra alvöru íslendinga með svo við næðum hringinn í kringum alþingishúsið okkar.

Önnur kona gekk framhjá..við kölluðum til hennar að koma og aðstoða okkur. Hún veifaði og hrópaði á móti að hún þyrfti að vera annarstaðar....en hún væri með okkur í anda. Mig langaði að æpa á eftir henni og spyrja hana hvort hún héldi að við værum með miðilsfund þarna í miðbænum!! Og það er engum hvítbókum um það að fletta að ef allir þeir sem eru með í mótmælum í anda..væru taldir með værum við fyrir löngu orðin hundraðþúsund og einn á Austurvellinum.

Annars hefði ég ekkert verið hissa á að andi Jóns Sigurðssonar hafi verið þarna á sveimi og reynt að lemja Björn Bjarnason og aðra ráðherra í hausinn..svona rétt til að vekja fólkið og minna þau á um hvað raunverulegt lýðræði snýst!!!

Var bara í framhaldinu að velta fyrir mér hvað sé mikilvægara en að mæta í bæinn á laugardaginn.

Hvort þið gætuð bent mér á  mikilvægari gjörning en þann að taka sér stöðu gegn núverandi ástandi??

Eina sem kemur í veg fyrir að ég mæti er að ég er dauðþreytt að draga á eftir mér handleggina eftir strekkingar gærdagsins..en samt hæstánægð með að við náðum hringinn.

Annað hefði verið svo táknrænt ömurlegt.

p.s Við kreppukall erum að spá í að mæta með potta og sleifar og hafa hátt á laugardaginn

Ég er náttla húsmóðir og það bara klæðir mig vel að vera með potta og pönnur í eftirdragi..en fyrst og fremst er ég mótmælandi og mun taka mér stöðu gegn þessum ósóma sem hér viðgengst þar til hann er horfinn.  Moka honum ofan í mold og myrkur og stappa svo yfir með skilti sem á stendur..SPILLINGARLIÐIÐ BURT!!!

 

Framkvæmdastjóri geðmála hjá WHO hlær að óhamingju Íslendinga......

....og annar aðili þar sagði þegar hann vissi að viðmælandinn væri íslendingur.."já fátæka fólkið" og hló!!! Mér finnst þetta hreint ekkert fyndið..að fátækt og óhamingja okkar séu aðhlátursefni. Þetta má lesa á baksíðu moggans í morgun.

Á heimurinn eftir að fá geðveikisleg hlátursköst þegar við verðum svo endanlega gjaldþrota, niðurbrotin, svelt og kúguð? Hlæja meira eftir því sem eymdin vex??? Hvernig í ósköpunum hefur ímynd þjóðar farið svo illa að þjáningar okkar og þrautir þyki hlægilegar??

Við verðum að standa upp og halda sjálfsvirðingunni kæru landar..þó svo að við höfum ráðamenn og embættismenn sem eru greinilega búnir að missa allt samband við raunveruleikann og einhversstaðar týnt viti og visku og geta ekki tekið neina þá ákvörðun sem gæti orðið okkur hinum til góðs.

 Málið er að þeir eru haldnir hugarmeini sem er sýkt af vondum grunngildum og þar sem græðgi og valdafýsn ræður ferðinni. Bara fársjúkt fólk.Sem skilur ekki eigin veikindi og sér ekki út úr augum. Ráðaleysið algert. Og það gengur ekki að þau ráði ferðinni og afleiðingarnar verði stöðugt sjúklegri..svo sjúklegar að heimurinn hlær að þrautum okkar sem fara bara vaxandi með hverjum deginum sem líður.

Núna verðum við að standa saman og koma þessu liði frá...látum ekki þvinga okkur í bandalög sem setja á okkur þumalskrúfur og er skítsama hvernig við höfum það.

Við verðum að fá neyðarstjórn sem fyrst,  og bæði innlenda og erlenda rannsóknaraðila sem við treystum til að hjálpa okkur að koma okkur á rétt ról og taka svo tíma í að endurbyggja samfélagið okkar á okkar forsendum.  Aðila sem geta gefið okkur svör um hvað er hvað..hvaða lög gilda og eftir hvaða reglum við þurfum að vinna. Eitthvað sem gefur okkur grunn til að standa á, botn til að spyrna í...svo við hættum að vera eins og þjóð sem er að sökkva í botnslaust drullusvað, meðan ráðamenn  í hroka sínum hanga á einhverjum leynifundum þar sem þeir halda áfram að skipta með sér ránsfengnum.

Ég trúi því að við venjulega fólkið séum alveg ágætisfólk og að það búi bæði í okkur heilmikið vit, skynsemi,dugnaður , kjarkur  og manngæska.  Þurfum við eitthvað meira til að skapa hér samfélag sem við getum unað sátt við okkar??? Getum við ekki kallað eftir hjálp utan úr heimi...kært stjórnvöld og ræningjana sem hafa rænt okkur öllu??

Vinnum tíma til að taka skynsamlegar ákvarðanir..ekki ana að neinu sem vanhugsaðar aðgerðir veikra stjórnvalda hafa þröngvað okkur í. Við megum ekki fara í einhverjar skyndireddingar..við verðum að hugsa lengra fram í tímann vegna barnanna okkar og þeirra sem eiga eftir að byggja þetta land til framtíðar.

Hættum að vera aðhlátursefni og komum þessu fársjúku valdamönnum og konum frá strax og vöndum okkur svo með framhaldið. 

Og ef einhver telur að hlutir séu í fínu lagi hjá þessari þjóð mæli ég eindregið með að sá hinn sami sitji heima á laugardaginn meðan við hin mætum á Austurvöll og tjáum með því andstöðu okkar við þennan furðulega farsa sem við erum öll lent inní og komumst ekki útúr sama hvað við spriklum.

Eins og þið kannski heyrið er ég búin að fá nóg af því að vitsmunum mínum og buddu sé nauðgað hvern einasta dag. Bara alveg nóg!!!! Og ég veit að þið fyrirgefið mér að halda mig ekki á mottunni með orðaval....en stundum verður maður að fá að kalla hlutina sínum réttu nöfnum. 

Landamæri Ríka mannsins, Stóra myndin og Veran. Tilveran.

Mikið var viðtalið við Gunnar Dal í Kastljósinu í gær frábært og yndislegt.

Hann talaði um landamæri ríka mannsins. Og að á bak við þau er ekkert nema tómið...og ríki maðurinn orðinn fangi peninganna sinna og á sér ekkert líf.  Alltaf gaman af svona vitringum sem skilja Veruna og tilveruna...og leitast við að sjá stóru myndina úr pússlinu.  Og hvað er svo tilveran...?

Þú!!!! Þú ert Veran og tilveran, og innst í miðjunni á þér er vonin og ljósið og allt.

Svo var ég að lesa pistilinn hans Jóns Steinars www.prakkarinn.blog.is

og hann er bara magnaður. Þið bara verðið að lesa hann. Þar deilir hann með okkur hugsunum sínum um örlög þjóðar og þreytu sinni á ástandinu.

Heyrði líka í manni á Bylgjunni í morgun sem sagði að honum liði eins og lambi sem væri verið að leiða til slátrunar. Óvissan algjör og vanvirðingin og fyrirlitning stjórnvalda gagnvart almenningi í landinum svo algjör að fólk hreinlega missir móðinn. Það var átakanlegt að heyra um hversu fólki er farið að líða illa í þessu fáránlega ástandi. Þetta hlýtur að teljast stórvægileg áfallaröskun að standa frammi fyrir að missa allt sitt og vera í frjálsu falli í margar vikur. Og enginn að bregðast við á neinn hátt. Þetta er bara ekki hægt!!!

Veit að það eru einhverjir sem ætla að mæta í hádeginu klukkan 12.00 og slá skjaldborg um Alþingishúsið...svona táknrænn gjörningur að standa vörð um lýðræðið okkar. Birgitta Jóns bloggar um það.  Best ég verði með í því.

Mér finnst betra að gera eitthvað frekar en ekki neitt. Krafturinn býr jú í okkur sjálfum og til einhvers verður að nota hann.

Ég ætla að láta eina ósk útí loftið og sjá hvað verður úr henni..en hún er sú að fólkiið í landinu mæti á Austurvöll á laugardaginn og standi upp fyrir sjálfu sér og gegn þessari fyrirlitningu og vanvirðingu sem okkur er sýnd á meðan við erum hædd og smáð og rænd öllu okkar. Það  minnsta sem við getum gert er að sýna að okkur er ekki sama. Það er bara fáránlegt að fara í einhverjar hártoganir um hverju nákvæmlega sé verið að mótmæla..hvað standi á skiltunum....af hverju það sé gert svona eða hinsegin..aðalatriðið er að sýna samstöðu með hvert öðru og gera stjórnvöldum ljóst að við ætlum ekki óspriklandi niður með þjóðarskútunni. Bara alls ekki!!!!

Þetta átti ekki að verða kreppublogg..en kreppan er farin að renna um æðar mér eins og þykkt blóð. Og mér rennur blóðið til skyldunnar.....og ég trúi  orðum Gunnars Dal.

Ég er Vera!!

Tilveran og við...Það ekkert sem getur slitið það í sundur.

Svo VERUM eitthvað almennilegt og látum ljós okkar skína inn í samfélagið okkar á þessum myrku tímum.

 

Stóð á kókkassa bak við ræðupúltið svo það sæist í mig að öxlum og fór með þetta fallega ljóð...

"Enn kem ég til þín Íslenska þjóð

sem átt þér sagnaminningar og ljóð

og byggt hefur þetta blessaða land

í ellefu hundruð ár.

Goldið afhroð. glaðst og sigrað

grátið svo þín tár

eru perlum öllum dýrri

okkur þeim sem hafa lifað!

Þetta ljóð flutti ég þá 12 ára telpuhnokki í hlutverki fjallkonunnar í Hafnarfirði á 17. júní. Svo lítil að ég náði ekki upp yfir púltið svo ég var látin standa á gömlum tré-kókkassa svo í mig sæist!

Ég veit ekki af hverju ég fór allt í einu að hugsa um þetta ljóð núna...

Kannski er þetta eitthvað sem við getum sagt einhvern tímann í framtíðinni og horft stolt um öxl á afrek okkar að komast heil út úr kreppunni og sagt börnum okkar og barnabörnum að við hefðum goldið afhroð.... en svo  glaðst og sigrað sem þjóð. 

Nú verðum við að standa saman fólk og megum ekki láta neinn bilbug á okkur finna. Ég vil reisa nýtt ísland á gildum sem eru einföld og skýr og standa fyrir allt gott í mannlífinu. Samfélag sem leggur sömu merkingu í hugtök eins og heiðarleiki, samkennd, traust og þar sem menn eru metnir eftir því að orð og gjörðir fari saman. Séu menn orða sinna. Að það þurfi ekkert nema þétt handaband til að innsigla heiðursmannasamkomulag og það standi. Og búa í landi þar sem við leggjum sömu merkingu í grunnhugtök eins og vanhæfi, óheiðarleiki, lygi og spilling. Að hvert einasta skólabarn skilji merkingu þeirra orða og hvað í þeim felst.

Kannski er ég bara þreytt eftir þessa stormasömu helgi. Úrvinda af því að sjá hvernig allt er skrumskælt og hvernig grímulaus spillingin veður uppi og við getum ekkert gert nema koma saman á laugardögum og mótmælt. Mótmælt því að öllum grunnöryggisstoðum okkar hefur verið kippt undan okkur og við erum í frjálsu falli...og enginn veit hvar lendingin verður. Meira að segja fjölmiðlarnir felldu grímur sínar og sýndu það svart á hvítu hverra erinda þeir ganga.

Er enginn endir á hvert spillingin nær með kolsvörtum krumlum sínum í þessu þjóðfélagi???  Og eru engin takmörk fyrir því hvað hægt er að bjóða okkur uppá??

Ég man þegar ég kom heim fyrir ári síðan eftir 7 ára dvöl í englandi hvað mér fannst gott og gaman að koma heim til landsins míns fagra og fína . Mér fannst það draumi líkast og trúði enn  að við værum sérstök og einstök, vel gerð og heillandi en núna aðeins örstuttu síðar erum við stödd í miðri martröð og það er engin leið að vakna. Hún bara heldur áfram og áfram og fólkið sem við viljum ekki situr sem fastast og endurtekur sömu frasana sem við hin erum löngu hætt að trúa á og við viljum bara fá frið til að byggja upp landið okkar.... en þau sitja sem fastast og heyra ekkert og fara með sömu frasana sem enginn trúir og sjá ekkert rangt við hegðun sína eða gjörðir..... og halda áfram að sitja sem fastast meðan allur heimurinn hlær hrossahlátri að aumingja kúguðu þrælunum sem komast ekkert og af alþingi sem er valdalaust eins og þjóðin og getur ekki komið þegnum sínum til hjálpar og fá engar upplýsingar og vita ekki neitt... og enn tala ráðamenn eitthvað út í loftið og heyra ekki neitt og sitja sem fastast og og og og  ...hljómar þetta ekki eins og djöfulleg martröð???

"Enn kem ég til þín íslenska þjóð.....

Ég ætla að trúa á þessi orð í ljóðinu og gera þau að áhrínisorðum okkar hins íslenska almennings. Glaðst og sigrað!! Við skulum leggjast öll á eitt og finna leiðir og lausnir út úr þessum stóru vandamálum..og við skulum ekki hætta fyrr en við erum laus við liðið sem situr sem fastast í óþökk okkar. Vinsamlegast farið burt..við hin höfum nefninlega mikilvæg verk að vinna, þurfum að bjarga lífi okkar og framtíð..eignast aftur von, samstöðu og trúverðugleika...svo hættið að trufla okkur með ráðaleysi og eiginhagsmunum ykkar.  Ef þið viljið að ykkar verði minnst af einhverju jákvæðu..þá verið svo væn að standa upp og fara. Láta eftir sæti ykkar hæfara og betra fólki. Takk!!!

 

 

 

 

 

Eigum við ekki að fá okkur göngu og skilja pappakassana eftir heima?

Þeir sem mótmæla og standa upp fyrir lýðræði og rétti þjóðar eru tíu sinnum verðmætari fyrir framtíð íslands en þeir sem heima sitja!! Trúi ekki öðru en að allir sem ekki eru með pappakassa yfir höfði sínu komi á morgun á Austurvöll og sýni samstöðu með sinni þjóð!!

Það verða nokkur hundruð skilti fyrir utan Borgarafundinn sem hefst klukkan 13.00  í Iðnó á morgun sem fólk getur tekið með sér á mótmælin á Austurvelli  klukkan 15.00. Nokkrir ungir menn tóku sig til og gerðu þessi skilti sem við getum öll fengið að nota. Flott framtak hjá þeim!! Á skiltunum stendur m.a Spillinguna burt og Borgum ekki!!!

Það verður  líka fróðlegt að bera saman talningu innlendra fjölmiðla og lögreglu og svo erlendra fjölmiðla sem fylgjast vel með hvað hér fer fram og eiga ekki orð yfir þeirri kúgun sem þeir eru að verða vitni að hérna. Við bara verðum að sýna veröldinni þarna úti að það renni enn í okkur blóðið og að við séum ekki algerlega máttlaus þjóð sem stendur ekki upp fyrir sjálfri sér.

Svo fáum okkur göngu í miðbæinn á morgun og látum ekkert stöðva för okkar á leið til alvöru lýðræðis. Hef heyrt að það verði einstaklega flottir ræðumenn á Austurvelli.

Þeir sem ætla að mæta á borgarafundinn ættu að koma tímanlega því ég get ekki ímyndað mér annað en að það verði meira en fullt út úr dyrum. Borgarafundurinn hefst klukkan 13.00 í Iðnó og það verða hátalarar úti svo fólk sem ekki kemst inn getur hlustað fyrir utan á umræðuna sem þar fer fram.

 

 Best að setja á sig baráttuskóna sína og halda áfram að þramma fyrir framtíð barnanna okkar...og okkar. Við eigum eftir að labba alla leið á toppinn..ekki gleyma því!!

Kæru lögreglumenn...munduð þið í alvöru handtaka þá sem mótmæla því hvernig farið hefur verið með þessa þjóð??

 Væri ekki nær að koma SPILLINGARLIÐNU BURT???

Maður spyr sig eftir fyrirsagnir dagsins í DV...6 nýir óeirðabílar, allt í einu til fjármagn til að auka fjölda lögreglumanna um 250 og fjarskiptamðstöð í strætó. Það sama er að gerast í bretlandi..þar er verið að auka styrk lögreglunnar..launahækkanir og mannaráðningar. Það hef ég eftir vini mínum í englandi sem er lögreglumaður. Og ég bara trúi því ekki  að lögreglumönnum væri það bæði ljúft og skylt að berja niður réttlát mótmæli almennings!!

Það væri nær að nota þetta lögreglulið til að losa okkur við SPILLINGARLIÐIÐ!!!! Handtaka þessa glæpamenn og koma þeim á bak við lás og slá og láta þá taka fulla ábyrgð sem og afleiðingum gjörða sinna. Þá yrði fólk kannski aðeins rólegra. Fólki er svo misboðið að það er farið að bullsjóða á öllum. Og stjórnvöld algerlega máttlaus í að ráða við ástandið og svo ráðalaus að það er grátlegt.

Spillingin, klíkuskapurinn og samtrygging hinna auðugu og gráðugu á sér engin takmörk. Og svo kann þetta fólk ekki að skammast sín eða biðjast afsökunar. Það gerir mig hvað reiðasta. Að firringin sé svo algjör að það rúmist ekki í kolli þeirra að gangast við gjörðum sínum á nokkurn hátt eða að taka nokkra ábyrgð.

Graftarbóla íslands er sprungin og út vellur gröfturinn..við skulum vona að það komi að því að hægt verði að hreinsa sárið og það grói á ný. Það hefur aldrei verið mikilvægara en einmitt nú að við almenningur sýnum samstöðu og látum ekkert hagga okkur í kröfunni um að hér verði allt rannsakað af óháðum aðilum. Við bara verðum að vita hvernig hefur verið í pottinn búið.

Minni á BORGARAFUNDINN í Iðnó á laugardaginn klukkan 13.00 Mætum öll þangað og svo mótmælum við á Austurvelli klukkan 15.00. BURT MEÐ SPILLINGARLIÐIÐ.

Þetta er krafa sem allir geta sameinast um að halda á lofti..ekki sammála?? 

p.s  ég bara neita að trúa því fyrr en ég sé það með eigin augum að það sé hægt að fá íslenska lögreglumenn til að fara gegn löndum sínum...fólkinu sínu. Kæru löggumenn og konur...Það eru vinir ykkar og ættingjar og ykkar eigin fjölskyldur sem verið er að arðræna og setja í framtíðarskldafangelsi í áratugi. Það síðasta sem fólkið okkar þarf núna er að vera handtekið, gasað og jafnvel lamið ofan á allt annað sem á undan er gengið.

Þið eigið að standa með okkur og hjálpa okkur að losa okkur við spillingarliðið!!!

Það væri sko almennilegt af ykkur!!

 

 

Myndin sem ALLIR eru að horfa á núna..og eflaust bara hollt fyrir okkur að skoða efni hennar.

 www.zeitgeistmovie.com

Svo mæli ég með því að liðið sem nú er verið að skuldhreinsa verði ormhreinsað í leiðinni.....það er svo greinilega maðkur í mysunni. Og það RISASTÓR!!!

Ef fréttamenn leggjast ekki allir sem einn í rannsókn á þessari frétt sem nú geysar um í bloggheimum og finna út hvað er satt í henni þá eru þeir ekki starfi sínu vaxnir. Mikil er reiðin orðin meðal almennings og það eru takmörk fyrir hvað er hægt að bjóða upp á mikinn subbugang á örfáum vikum.

 Hvað er að gerast bak við allar þessar luktu dyr í bænum???

Vitlaust talið og vitlaust gefið, rigning, kaffiilmur og kærleikskrepputal

Þegar maðurinn minn var búinn að lesa bloggið mitt í gær um ferð mína í  10 11 verslunina sem er allt of oft með vörur í hillum sínum sem eru ekki rétt verðmerktar... sagði hann hægt og rólega með djúpri röddu. "Katrín..ég fer í Bónus og geri helgarinnkaupin aleinn..það er best að þú farir bara og mótmælir á Austurvelli á meðan". Og ég gerði það eins og alla laugardaga hingað til og það þó ég væri enn með hálfgerða flensudruslu. Það var magnað að sjá hversu margt fók var komið til að sýna samstöðu og líka magnað að heyra í fréttum fjölmiðla að ég og allir þeir sem fara opinberlega gegn ruglinu og bullinu í ráðamönnunum séum bara talin vera einn fjórði af heilli manneskju. Eins og við mótmælendur höfum bara einn útlim, fimm tennur og tvöþúsund hár á hálfu höfði. A.m.k kosti tekst þeim alltaf að telja vitlaust og gera miklu minna úr okkur en efni standa til.  Hafiði tekið eftir hvað það er allt vitlaust talið og verðmerkt þessa dagana?? Og hreinlega vitlaust gefið í þessu samfélagi??

En ég er góð á sunnudagsmorgni. Er að hita mér kaffi, lesa bloggið og kætast yfir góðum orðum hér og þar. Þetta er t.d ein setning sem ég fann í athugasemdum í Blogginu hennar Láru Hönnu sem birti einmitt svo flottar myndir af mótmælunum í gær. Þar segir Baldur nokkur..." þeir sem mættu til að mótmæla eru tíu sinnum meira virði fyrir framtíð Íslands en þeir sem heima sátu" Og mér líður bara eins og million dollar woman today..finnst eins og ég geri gagn og skipti máli. Ég vil líka vekja athygli ykkar á því að Lára Hanna verður í Silfrinu hjá Agli á eftir. Hlakka til að heyra í henni þar.

Maður einn á besta aldri sem spilar oft á gítar og syngur lög eftir Hörð Torfason spurði mig í gær hvort ég ætlaði ekki bara á fullt í pólitíkina.  Ég sagðist ekki hafa neinn hug á því þar sem mér hugnast ekki flokkakerfið en ég væri til í að leggja þeim breytingum lið sem mér finnst vera nauðsynlegar í þessu landi og taka þátt í allri þeirri hugmyndavinnu sem nú á sér stað um allt land. Það er alls staðar fólk að hittast og skoða og skilgreina hvernig samfélag við viljum byggja upp úr rústum þess gamla. Hver gildin eru sem við elskum að hafa og viljum  sjá blómstra á öllum sviðum samfélagsins. Svo vildi hann eitthvað rökræða hvort mótmælin væru að virka og svona...en vitiði það að það er mér ekkert kappsmál að sannfæra einhvern annan um að  hann eigi að mótmæla. Það er bara eitthvað sem hver verður að finna út fyrir sig. Hvenær er maður búinn að fá nóg?? Og hvenær er manni verulega misboðið.  Ég veit það fyrir mig og þú verður að vita fyrir þig.  Svo annað hvort fylgir maður því eftir með framkvæmdum eða ekki. Svo einfalt er það nú.

 Ég er líka viss um  að þau tár sem spretta fram í þrengingunum sem nú ganga yfir þjóðina munu breytast í svalandi daggardropa á framtíðardögunum okkar. Breytingar eru sjaldnast átakalausar..sérstaklega ekki umfangsmiklar breytingar eins og við erum núna að ganga í gegn um. Þær kosta blóð, svita og tár en munu koma okkur á betri stað þegar upp er staðið. Því trúi ég algerlega.

Jæja kaffiilmur fyllir nú heimilið mitt og ég heyri í rigningunni úti. Það er loksins ró og friður í hjarta mínu. Ég er þess fullviss að við getum allt bara ef við stöndum saman og hjálpumst að í gegnum þessa tíma og gleymum ekki hvað það er sem skiptir mestu máli.  Kærleikur og kraftur....eða kraftmikill kærleikur. Og það að kunna telja og gefa öðrum með sér.

Eigið góðan sunnudag öll sömul

 

Ég næstum tuskaði aumingja afgreiðsludrenginn til með augunum...og ég treysti því að þið mætið hvert og eitt einasta ykkar á mótmælin í dag!!!

Vá hvað það bullar og sýður á mér núna. Það er svo oft að það þarf bara eitt lítið atvik ofan á röð atvika til að gera konu bandbrjálaða. Eftir fréttaflutning af afskræmdu lýðræði og vanmætti íslenskrar þjóðar gagnvart ráðamönnum sem hvorki vilja hlusta né sjá þesssa vesalinga sem kallast almenningur...er mér svo misboðið að ég verð bara að halda mér þessa dagana. Enda er enginn endir á hroka og vanvirðingunni sem okkur er sýnd. Stundum mörgum sinnum á dag. 

Þegar manni er farið að líða svona þarf stundum ekki mikið til að setja mann af stað í ergelsi og  reiði.

Í morgun þurfti ég að fara í búð til að kaupa svolítið sem mig vantaði.. klukkan var bara rétt um 8 svo ég varð  að fara í 10 11 verslun..sem ég reyni að forðast í lengstu lög.  Bæði vegna hás verðs og endalaust  rangra verðmerkinga. Varan sem ég ætlaði að kaupa kostaði samkvæmt verðmerkinu í hillu 399 krónur en við kassann 549. Drengurinn sem var þarna að afgreiða yppti bara öxlum þegar ég benti honum á þetta og sagði vöruna klíklega hafa hækkað "eða eitthvað". Einnig var ég að kaupa kókómjólk..á hillunni stóð 97 krónur en verð við kassann var 103 krónur!!!  Ég skilaði henni og neitaði að kaupa hana. Hina vöruna varð ég hind vegar að kaupa...neyðarvara á þessum tíma mánaðarins. Úff hvað ég var prirruð...teymdi drenginn að hillunni og sýndi honum hversu miklu munaði á verði. Við tókum annan pakka og athuguðum verðið..það var jafnhátt. Engin vara í hillunni var í raun á 399 krónur. Samkvæmt neytendalögum á maður að borga hilluverðið þar sem varan er.

Aumingja drengurinn fékk yfir sig ræðu um að þessi verslun ef verslun skyldi kalla hreinlega rændi almenning um hábjartan dag...og það væri lágmark að maður vissi hvað hlutirnir kosta og í svona kreppuárferði skipti hver einasta andskotans króna máli fyrir sumar fjölskyldur. Svo rauk ég út fjólublá í framan

Þetta er bara eitt af fjölmörgum atriðum sem við fólkið í landinu þurfum að láta yfir okkur ganga hvern einasta dag..endalaust og það er eins og það nái engin lög yfir til að breyta svona augljósum földum þjófnaði úr buddunni minni.

Vitið það að í bretlandi eru lög og reglur sem menn verða að fara eftir. Ef vara er á öðru verði í hillu en við kassa eru viðurlögin sú að sekta viðkomandi verslun um 5000 PUND fyrir hvern hlut í hillunni sem auglýstur er á lægra verði en við kassa.  Þetta þykir það alvarlegur hlutur að blekkja neytandann. En hér er alveg sama hvað við kvörtum og kvenum og berjumst um á hæl og hnakka að láta ekki stela af okkur peningunum okkar um hábjartan dag...það gerist andskotann ekki neitt!!!

Og þetta dæmi er bara ein birtingarmyndin af ástandinu í þessu þjóðfélagi....við erum stöðugt svívirt og almennri skynsemi okkar nauðgað daglega af yfirvöldum og ráðamönnum. Ekki bara dag eftir dag..heldur ár eftir ár. Og ég er svo búin að fá nog af því að vera misboðið svona endalaust að ég er að spá í að flytja bara niður á Austurvöll og mótmæla frá mér allt vit. Eða þar til ég sé raunverulegar breytingar. ÉG vil bara þetta lið frá..burtu með þetta og byrja upp á nýtt. Og ég vona að fleirum sem líður eins sýni nú með því að mæta hvernig þeim líður og hvað þeim finnst. Eina sem maður þarf að vita til að mæta og sýna samstöðu er að maður er BÚINN AÐ FÁ NÓG!!!!!

Og ef  fjölmiðlar og lögregla voga sér að segja mig og þúsundir annarra bara vigta á við 500 manns eina ferðina enn..þá ssegi ég mig úr þessu bananasamfélagi og hugsa alvarlega um að flyta úr landi. Mér hugnast hreinlega ekki að búa hér lengur og áta bjóða mér og mínum uppá svona heimsku og þvaður lengur. Vitsmunum mínum er verulega misboðið..ég er hvorki fífl né fáviti.

Þess vegna mun ég mæta í dag á Austurvöll klukkan 15.00. Minni á að að verður ganga frá Hlemmi klukkan 14.00 að Austurvelli þar sem verða fluttar þrumandi ræður.  

Ég á ekki annara úrkosta en að mæta...þ.e ef ég ætla að halda í sjálfsvirðinguna mína. Ég bara get ekki látið bjóða mér þetta meir.  En þú???

Húsmóður í vesturbænum rænt af róttækum byltingarsinna.

Ég veit ekki hvað hefur komið yfir mig. Eins og allir vita sem mig þekkja hef ég ekki áhuga á stjórnmálum og kýs aldrei neinn flokk þar sem ég trúi einlæglega að það sé sama rassgatið undir þeim öllum saman og aðeins eiginhagsmunir og græðgi sem ráði för. Ég hef bara allt aðrar hugmyndir um samfélög og lýðræði en það sem hefur verið iðkað hér á landi of lengi.

En nú er eitthvað undarlegt að gerast. Hvort það tengist undarlegum ljósagangi á himnum undanfarið skal ósagt látið, en húsmóðir er farin að haga sér furðulega og vekja undrun hjá þeim er að henni standa og ekki síst henni sjálfri.  Innra með henni bærir nú á sér gamall byltingarsinni...sem lætur öllum illum látum, hertekur hinn fínlega húsmóðurlíkama og þrammar með hann á mótmæli og borgarafundi um allan bæ og skrifar ódauðlegar ræður í höfuð hennar og plantar þar alls kyns hugmyndum um breytt og bætt þjóðfélag. Annars konar samfélagsgerð . gildi sem halda manngildinu á lofti og situr svo og bloggar í gegnum fima fingur hennar daga og nætur eins og það sé no tomorrow!!!

Jahérna ..öðruvísi mér áður brá.

En ég held að bæði byltingarsinninn og húsmóðirin séu bara búin að fá sig fullsödd af bulli og bræðralögum sem eru bara fyrir fáa útvalda og heimta nú að þó öllu öðru sé frá þeim rænt muni þau aldrei gefa frá sér sjálfsvirðinguna sem er eitt það dýrmætasta sem svona par getur átt.

Já þið getið tekið hús og bíl, peninga og stöður, en sjálfsvirðinguna okkar fáið þið ekki kæru stjórnarhjú.  Ég fer ekki óspriklandi niður með hriplekri þjóðarskútu með ávísun upp á það að börnin mín og barnabörn..þetta vel gerða og fallega fólk mitt... verði múlbundin á galeiðunni næstu áratugina.

Nei...það verður ekki svo svo lengi sem ég anda og hugsa. Þess vegna er ég komin úr gráköflótta hagkaupssloppnum mínum, búin að rífa úr mér rúllurnar og sit hér rjóð í kinnum og rökræði við byltingarsinnann í mér um hvar við komum að sem mestu gagni  þessa dagana. Vð erum sammála um að gamli góði eldhúsvaskurinn verði að sætta sig við einmanaleika og afskiptaleysi..því við ætlum út að breyta, bæta og gera byltingu og  bölva  svo eins og gamlir sjóarar því hvernig farið er með fólkið okkar. 

Við horfum á hvert annað..ég og byltingarsinninn.. og sammælumst um að vanda vel til verka og vera bæði skynsöm og prúð, kjarkmikil og kærleiksrík óg láta engan segja okkur að við eigum ekki erindi.  En gefa samt ekki tommu eftir í sannfæringu okkar um að hér verði að verða til nýtt samfélag..sem er fyrir okkur öll.

Best að hella sér upp á kaffitár og hugsa málin. Það er nefninlega svo gott að gefa sér tíma til að finna hvað manni sjálfum raunverulega finnst og hvað maður er tilbúinn að láta bjóða sér og hvað ekki. Og fara svo og gera eitthvað íði. Annars fer bara sjálfsvirðingin ofan í klósettið með öllu hinu draslinu. Og það bara má ekki gerast.

p.s Gunnar sem stóð fyrir borgarafundinum í Iðnó í gær sagði í viðtali á Bylgjunni í morgun að honum fyndist komin tími til að gefa okkur stelpunum pláss.

Hann sagði eitthvað á þá leið að við  værum svo jarðbundnar, klárar og meðvitaðar.. og það væri tímabært að gefa okkur tækifæri til að láta ljós okkar skína. Mér fannst þetta bæði sætt og satt hjá manninum.

Það má ekki á milli sjá hvor  skín skærar..ég eða ljóssúla Yoko Ono ...sem ég horfi á út um eldhúsgluggann minn. Gott ef ég hef ekki bara vinninginn  Ég er allavega með orku á við þúsund milljarða..ath milljón er ekki lengur tala... vatta jólaperu og samt er enn bara október.