Umbreytingar

Þegar ég les bloggið mitt til baka sé ég að ég hef breyst og er orðin miklu "Íslenskari" svona meira hipp og kúl á yfirborðinu og feimnari með innaníið...ekki eins mjúk og flæðandi og ég var fyrir svona hálfu ári. Það mátti nú svo sem eitthvað á milli vera. En nú þarf kona að fara í náttúrugöngur og finna stundir til að sitja, hugsa og hlusta á sjálfa sig en ekki allan þennan lífsins nið sem lætur mikinn í ytri veröldinni.

Það þýðir ekkert að gleyma sér. Dró spil í morgun hjá Vilborgu bloggvinkonu og skilaboðin til mín voru þau að það væri ekki það sama að hafa mikið að gera og að vera skapandi. Ég skildi það. Hef haft svo rosalega mikið að gera undanfarið að ég hef ekki haft tíma til að vera til og skapa mér mína eigin tilveru á mínum forsendum.

Mér þykir væntum landið mitt og fólkið mitt hérna og ykkur bloggvinir. Og nú verður hjartastöðin bara höfð opin þó hún geti verið pínu viðkvæm í hryssingslegri veðráttu. Megi góðvildin vera ykkar förunautur í dag og mæta ykkur hvar sem þið komið.