Gamli góði vinnustaðurinn í nýju hlutverki...og ég líka!!

Það var góð tilfinning að koma inn á gamla góða vinnustaðinn minn eftir langa fjarveru og setja þar upp myndlistarsýningu.  Endur fyrir löngu þegar ég var yngri var útvarpsstöðin Aðalstöðin fm 90.0 þarna til húsa og þarna kynntist ég mörgu frábæru fólki. Gurrí bloggstjarna var þarna með bókaþætti og kaffiþætti og spilaði skemmtilega tónlist og lét auðvitað sinn einstaka húmor skína skært, Jóna Á Gísladóttir bloggvinkona las svo auglýsingarnar og Zordís bloggvinkona var þarna um tíma líka ásamt Ingibjörgu Gunnars sem er líka ein af bloggvinkonum mínum.

Ég var með útvarpsþætti og seldi auglýsingar og það var yndislegt að vinna í þessu gamla húsi sem er fullt af sögu og sál. Núna hefur það verið endurbyggt í formi hótels og kaffibars og þar er einmitt sýningin mín. Gömlu hlöðnu veggirnir og trébitarnir hafa eflaust margar sögur að segja og geta örugglega raulað mörg kunnugleg lög og gamla góða slagara fyrir gesti og gangandi en eru nú bakgrunnur saga sem sagðar eru í litum og formum. Áður var ég útvarpskona í þessu húsi og núna er ég myndlistarkona. Mér þykir voða vænt um að geta farið svona hring í lífinu og eiga viðkomu í sama húsinu en núna í annars konar hlutverki. Þannig er reyndar lífið svo oft.

Opnunin var sl laugardag og þar komu vinir og vandamenn ásamt nokkrum bloggvinum til að samfagna mér og það var yndislega góð stund fyrir mig. 

Ég ætlaði að setja inn nokkrar myndir frá opnuninni en "tæknin er eitthvað að stríða mér hér"..þetta sagði maður nú stundum þegar manni brást bogalistin á útsendingarborðinu í útvarpinu í denn ....svo ég tók mér það bessaleyfi að fá lánaða fína mynd sem Guðmundur bloggvinur minn tók í gær þegar hann fór og kíkti á myndirnar. Vona að það sé í lagi.

 

 

Þið eruð auðvitað öll hjartanlega velkomin að kíkja við og skoða í Aðalstrætinu númer 16. Það er svo huggulegt að fá sér kaffisopa í þessu fína húsi enda jólastemmingin í miðbænum alveg einstök núna.  

Ég tapaði aðeins fyrir flensu frænku eftir allan atganginn en verð örugglega orðin stálslegin fyrir vikulok.

Allvega verð ég þar eitthvað um helgina og drekk kaffi með gestum og gangandi. Get þá líka sagt ykkur sögur af myndunum.

p.s fyrirfram þökk fyrir allar batakveðjur en í alvöru..mér er svo að batna!!!! "Það tekur bara tíma að aðlagast íslenska veðurfarinu" segi ég líkamanum mínum og klappa honum góðlátlega.

Sýningarstaður er

Hótel Reykjavík Centrum, café /bar Uppsalir

Aðalstræti 16.

Allir hjartanlega velkomnir.

 

 

 

Athugasemdir

[Steinunn Helga Sigurðardóttir, 5.12.2007 kl. 21:13]

til hamingju með þetta kæra katrín

ljós til þín

steina 

[Ásdís Sigurðardóttir, 5.12.2007 kl. 21:14]

Til hamingju með sýninguna, ég ætla að ger mitt besta til að komast og skoða myndirnar.  Farðu vel með þig. 

[www.zordis.com, 5.12.2007 kl. 21:15]

Til HaMiNgJu ....... með sýinguna og hringferðina, út í geim og aftur heim.  LJóðrænn flutningur í fallegum myndum þínum, mikið hefði ég viljað geta verið með þér og þínum vinum ... fæ í hjartað  því mér líður að hluta til eins og þér nema kanski minna stress ....

ást í poka sem ekki má loka .....

[Jenný Anna Baldursdóttir, 5.12.2007 kl. 21:23]

Til hamingju elsku Katrín og láttu þér batna.

[Hulda Bergrós Stefánsdóttir, 5.12.2007 kl. 21:31]

Flott sýning og takk fyrir mig

Það er yndislegt að koma i svona hús með sál

[Kristín Katla Árnadóttir, 5.12.2007 kl. 21:34]

Til hamingju Katrín mín ég ætla vona að ég  geti komist á sýninguna.

[Inga Helgadóttir (IP-tala skráð) 5.12.2007 kl. 22:12]

Til hamingju með sýninguna Katrín mín.  Hún er mjög flott og myndirnar í senn, ljúfar, fallegar, kröftugar og lifandi.  Ég mun líta við aftur og fá mér kaffisopa og horfa og njóta myndanna í rólegheitum.

Vona þér batni flensan fljótlega.

[Guðný Anna Arnþórsdóttir, 5.12.2007 kl. 22:13]

Já, enn og aftur, hjartans þakkir fyrir mig! Þetta er myndlistarsýning með stóra sál í gömlu húsi, með sál. Gæti ekki verið harmonískara. Kem aftur!

[Sigurgeir Orri Sigurgeirsson, 5.12.2007 kl. 23:46]

Til hamingju með sýninguna Katrín!

[Svava frá Strandbergi , 6.12.2007 kl. 00:18]

Þakka þér aftur innilega fyrir mig. Heldurðu að þú getir kíkt við hjá mér einhvern tímann í miðri næstu viku? Mig er farið að langa til þess að fá verðlaunamyndina mína, en ég var lasin eins og þú manst þegar þú ætlaðir að koma með hana. Ef þú átt óhægt með að koma geturðu kannski tekið hana með þér á sýninguna þína? Ég á leið um þarna um, á morgun fimmtudag á milli klukkan 13 og 14. Ég kíki allavega við hjá þér á morgun og skoða sýninguna þína aftur.

Kveðja.

[Vilborg, 6.12.2007 kl. 01:33]

Til hamingju með sýninguna þína

Hvað stendur hún lengi?  Er að koma  í bæjarferð á miðvikud. og langar svo að kíkja á hana

[Ágúst H Bjarnason, 6.12.2007 kl. 06:46]

Ég er þegar farinn að hlakka til að skoða sýninguna aftur. Eins og Guðmundur segir, þá er hún stórkostleg. Maður þarf þó að vera tilbúinn að gefa sér smá tíma til að njóta, myndirnar eru þannig. Maður sér sífellt eitthvað nýtt í þeim.  Leyfa ímyndunaraflinu að leika lausum hala.

Til hamingju Katrín !

[Steingerður Steinarsdóttir, 6.12.2007 kl. 09:53]

Vá, flott.

[Ásthildur Cesil Þórðardóttir, 6.12.2007 kl. 17:23]

Afskaplega þykir mér leitt að hafa verið veðurteppt hér heima þegar sýningin var opnuð, og það sama gerðist núna í gær, ekki flogið og alles, mér er farið að líða eins og Túrillu þeirri færeysku í túlkun Eddu Björgvins í den.  En þetta sýnist mér vera hin allra glæsilegasta sýning.  Og ég kem, þó síðar verði.  Til hamingju enn og aftur með sýninguna þína elskuleg.

[Hrönn Sigurðardóttir, 6.12.2007 kl. 19:01]

Ætla að reyna að komast. Komst því miður ekki á opnunina til þín - farðu vel með þig krúttið mitt

[Þórarinn Þ Gíslason (IP-tala skráð) 8.12.2007 kl. 05:45]

KOMST EKKI VEGNA FLENSU.

 ÉG ER Á LEIÐINNI.

HEITT Á KÖNNUNNI?

[www.zordis.com, 8.12.2007 kl. 10:20]

[Ragnhildur Jónsdóttir, 9.12.2007 kl. 18:31]

Ég fór á sýninguna í dag. Mikið eru myndirnar fallegar! Ef ég ætti aaaaðeins meiri pening, hefði ég keypt tvær! Var að vonast til að hitta á þig en það er nú ekki hægt að búast við að þú sitjir þarna alla daga auðvitað. svo hefði ég ekki einu sinni þekkt þig í sjón

(ég hefði samt viljað bæta við ljóskösturum á staðnum...)

Vona að þú sért laus við þessa flensu sem er að angra ansi marga þessa dagana.

knús og klemma og innilegar hamingjuóskir með sýninguna

[Ágúst H Bjarnason, 9.12.2007 kl. 18:42]

Ég fór aftur á sýninguna í gær og naut betur en síðast.  Birtan hefði reyndar mátt vera heldur meiri á suðurveggnum, en ég var þarna eftir sólarlag og lýsingin hafði greinilega verið dempuð eitthvað.   Ég verð bara að koma í þriðja sinn og þá í björtu.  Vonandi verður listakonan þá á staðnum.     Kaffið var auðvitað mjög gott og notalegt að sitja meðal myndanna

[Hugarfluga, 10.12.2007 kl. 21:46]

Ætla að drífa mig í vikunni og hlakka mikið til! *koss*

[Jón Steinar Ragnarsson, 11.12.2007 kl. 01:00]

Mæti á helginni, geðveikt að gera hjá mínum.  Vona að ég rekist á þig. Vonandi hefur þú ekki orðið hraðanum að bráð hér heima. Lengist ískyggilega á milli færslna.

[Katrín Snæhólm Baldursdóttir, 11.12.2007 kl. 01:21]

En hvað ég elska þetta orðatiltæki...Á helginni

Minnir mig á ísafjarðartímann minn. Endilega bara að senda mér mail ef þið eruð á ferðinni og ég skutlast niðureftir og fæ mér kaffi með ykkur!!!